Matewu 24 - Bhiblia Yo Sawuleka

Jesu e zivisa kukhundumuswa ka Dithepele

¹ Ngako Jesu a txi huma ngu Dithepeleni e tsimbila, vagondiswa vakwe va to mtshuketela, kasi ku mkomba maakelo a Dithepele.

² Aniko ene a to va gela ku khene: “Ma si wona sotshe siya, kani? Kha ditshuri na mi gela ku khani: Kha ku na mbi sala dirigwi txitimwi ka dirigwi, adi di no mbi khundumuswa.”

Makhato a sixaniso

³ Jesu, a di khalahatshile txitimwi ka mmango wa Miolivha, va to ta kwakwe, i di vona vokha, va txi ta kha vona: “Hi gele mbimo yi ti no maheka ngu yona totshe tiya ni txikombiso txa kuta kwako ni txa kuguma ka ditiko.”

⁴ Jesu a to va xamula a txi khene: “Ti woneleni kasiku mi si timetwi ngu m'thu.

⁵ Nguko va nata vavangi ngu ditina dangu, va txi kha vona: ‘Ngani Kristu’, va txi xenga vathu votala.

⁶ Mi na pfa va txi womba ngu tiyimbi ni maguwa a kulwa, aniko mi nga thaveni txilo. Atiya ti fanela kumaheka, aniko hi nga magwito.

⁷ Ditiko di na wukela dimwani ditiko, mfumo wu na wukela wumwani mfumo, ku nava ni tipaya ni mitungu ni kuzinginikela ka mafu, ka makhalo amangi.

⁸ Totshelele tiya ti nava i di kukhata ka sixaniso.”

⁹ “Sekoko va na mi ningela kuxaniswani ni kudawani, mi na vengelwa ngu votshe vathu, ngu mhaka ya ditina dangu.

¹⁰ Ka yoneyo mbimo, vavangi va na thindeka, va txi ningelana ni kuvengelana.

¹¹ Va na humelela vaprofeti vavangi va makuhu, ava va no timeta vathu votala.

¹² Se ngu mhaka ya kutala ka wubihi, lirando la wungi wa vathu li na hola.

¹³ Aniko awule a no zumba a di tsani kala magwito, a na hanyiswa.

¹⁴ Evhangeli yiya ya Mfumo yi na huwelelwa ka dotshe ditiko, kasi kumahwa wufakazi ka yotshe mifumo. Se msana keto, ngu kona ku no va i di magwito.”

Kuxaniseka ka hombe

¹⁵ “Ngu konaho, mbimo yi mi no wona manyala a kuthisa, ma nga songolela kuwombwa ngu mprofeti Dhaniyeli ma di talete wukhalo wo sawuleka, (awu a gondako a na ti pfisise!)

¹⁶ Konako, ava va manekako Judheya va na thavele mimangoni;

¹⁷ awule a manekako txitimwi ka nyumba, a nga txhike a ta ti tekela simaha sa nyumbani kwakwe;

¹⁸ ani wu a manekako thembweni, a nga tshumele a txi ya m'tini, a txi ya teka nguwo yakwe.

¹⁹ Dikhombo da vavasikati va sirumbu ni da vale va nota maneka va txi mamisa ka masiku oneyo!

²⁰ Khongelani kasi kuthava kwanu ku si maheki ngu mbimo ya wuxika mwendo ngu ditshiku da Sabbata,

²¹ nguko, keyo mbimo, kuxaniseka ku nava i di ka hombe ngutu, kova ku si zivi kuwonwa, kukhukhela kukhatani ka ditiko kala nyamsi, akuwa kambe ku no mbi nga va ni kumaheka kambe.

²² Se idiku ma sa komiswa masiku ale, kuwalo ni txivangwa tximwetxo txi ndino sikota kuhuluka. Aniko, ngu mhaka ya vasawuleki, masiku ale ma na komiswa.”

²³ “Ka yoneyo mbimo, ngako va txi mi gela ku kha vona: ‘Kristu ndiyo hawa’ mwendo ku: ‘Ndiyole haleya’, mi nga tumeleni.

²⁴ Nguko va na humelela vamesiya va makuhu ni vaprofeti va makuhu, ava va no maha sixamaliso ni sidiwukiso sa hombe, ahawa koza, idiku to koteka, hambi vasawuleki va ndi na timetwa.

²⁵ Wonani, ni songolete ku mi gela.

²⁶ Ngu toneto, va txi mi gela ku: ‘Ene a txiwulani’, mi nga yeni; mwendo va txi kha vona: ‘Ene waho nyumbani’, mi nga tumeleni.

²⁷ Nguko kufana ni kukeluka ka nzuma ku wonekako kukhukhela wutxani kala mswa-ditambo ku na mahisa toneto kuta ka Mwanana wa M'thu.

²⁸ Ahawa ku no va ni txirumbi, sinyana sa makoti ni sona si na ya tshanganela koneho.”

Kuwuya ka Mwanana wa M'thu

²⁹ “Kunukunuko, ngako si di gumile sixaniso sa masiku ale, ditambo di na pfhupeliswa, mtxima kha wu na mbi ninga liwoningo la wona, tinyeleti ti na wa ngu nzumani, ani mitamo ya nzumani yi na zinginiswa.

³⁰ Sekoko ku na woneka txikombiso txa Mwanana wa M'thu nzumani; se totshe tihunzu ta ha mafuni ti na dila, ngako ti txi wona Mwanana wa M'thu a txi ta a di txitimwi ka marefu a nzumani ni mtamo ni wudhundo wa hombe.

³¹ Ene a na rumela tingelozi takwe ngu kuvetwa ka mpundu wa hombe, kasi kuramba vasawuleki vakwe ngu ka otshe maphambo a mune, kukhukhela magemeta-mitshi ka nzuma kala kumwani magemeta-mitshi ka yona nzuma.”

Txidinganiso txa mxanvu

³² “Gondani ngu txidinganiso txa mkuwu: Ngako madhavi a wona ma txi nyuka ni kuthunga linyenvu, ma tiziva ti to malanga ma hafuhi.

³³ Ngu toneto, ngako nanu mi txi wona totshelele tiya, ti txi humelela, ti ziveni ti to ene a hafuhi, a ha txikeni.

³⁴ Kha ditshuri ni khani kwanu: Liveleko liya kha li na mbi pinda, na totshe tiya ti sa maheka.

³⁵ Nzuma ni mafu si na pinda, kambe mapswi angu kha ma na mbi pinda.”

Ditshiku ni mbimo

³⁶ “Ngu mhaka ya ditshiku da kona ni txikhati txa kona, awalo ni mmweyo a ti zivako, hambi tingelozi, hambi Mwanana wa M'thu, ti ziwa ngu Tate ekha.

³⁷ Nga ti ti nga maheka ka masiku a Nowa, ku na vanga toneto kuwuyani ka Mwanana wa M'thu.

³⁸ Ka masiku ale, ku sinzi kumaheka ndambi, va ti ti dya ve sela, va txi teka ni kutekwa, kala ka ditshiku di Nowa a nga wulela mu ka ngalava;

³⁹ kha va pimisa txilo, kala ku txi hoka ndambi, yi nga khukhula votshe. Ina, ti na mahisa toneto ngu kuwuya ka Mwanana wa M'thu.”

⁴⁰ “Ka yoneyo mbimo, ku na maneka vavamna vambidi thembweni: Mmweyo a na tekwa, mmwani e lekwa.

⁴¹ Ku na maneka vavasikati vambidi va txi gaya ngu txigayo: Mmweyo a na tekwa, mmwani e lekwa.

⁴² Wonelelani, nguko kha mi di zivi ditshiku di a nota ngu dona Mkoma wanu.

⁴³ Ti engiseni kha kwati atiya: Idiku nyamne wa m'ti wo yi ziva mbimo ya wusiku, yi di nota ngu yona dikhokhokho, nga a txi zumba a di rinzete, ti to nyumba yakwe yi si faywi.

⁴⁴ Ngu toneto, zumbani nanu mi di rinzete; ka txikhati txi mi si pimisiko txilo, ngu yoneyo mbimo a nota ngu yona Mwanana wa M'thu.”

Txithumi txo thembeka ni txithumi txa kwa mbi thembeka

⁴⁵ “Ngu toneto, i mani i ku txithumi txo thembeka na a di ni wutxhari, awu a nga vekwa ngu nyamne masoni ka sithumi sakwe, kasiku e si phamela sakudya ngu txikhati txi txi fanelako kani?

⁴⁶ Txi katekile txithumi txile nyamne wa txona, mbimo yi a no wuya a nota txi mana txi txi thumisa toneto!

⁴⁷ Kha ditshuri na mi gela ti to a nata txi ninga kuxayisa sotshe si a ku naso.

⁴⁸ Aniko, ngako i di txithumi txo biha, atxiya txi wombako ngu mbilu tito: ‘Nyamne wangu wa swela’,

⁴⁹ se txi txi khata kupeketela sithumi kulowe, txi khata kudya ni kusela kumweko ni madevi.

⁵⁰ Se nyamne wa txithumi-txo a na wuya ngu ditshiku diya txona txi no va txi si di rinzeli, ni ka txikhati txo mbi ziwa.

⁵¹ Ene a nata txi tsayisa ngutu, a nata txi yisa ka wukhalo wa vaxengeteli; konaho ku nava ni tihuwa ni kugegeresela ka makwasa.”