Matewu 22 - Bhiblia Yo Sawuleka

Txidinganiso txa m'buso wa mtxhadho

¹ Sekoko Jesu a to engeta a txi womba-womba ngu sidinganiso a txi khene kwawe:

² “Mfumo wa nzumani wu fananiswa ni mfumeli wokari, a nga lulamisa m'buso wa mtxhadho wa mwanana wakwe wa dijaha.

³ A to ruma sithumi sakwe kuya dhana ava va nga rambwa kuta m'busoni, aniko vona kha va tumela kumaneka.

⁴ A to engeta e ruma simwani sithumi, a txi si leleta a txi khene: ‘Gelani avale va nga rambwa, mi txi khanu: Sakudya si lulamile; ni date tihomu tangu ni sifuyo sangu sa kunona, sotshe si lulamisetwe. Ngonani m'busoni!’ ”

⁵ Aniko vona kha va khatala ngu tona, va to ti tsulela mmweyo a txi ya thembweni kwakwe, ni mmwani a txi ya mabhinduni kwakwe.

⁶ Vamwani va to ñola sithumi ve si xanisa ni ku si daya.

⁷ Se mfumeli a di ti pfite eto, a to henya ngutu e ruma tiyimbi takwe kuya fuvisa sigevenga sile, ve hisa didhoropa da sona.

⁸ Se a to womba kambe ka sithumi, a txi khene: M'buso wu lulamile, aniko avale va nga rambwa kha va nga va ni fanelo.

⁹ Ngu konaho, tsulani mi txi ya mahandakanyani ka tinzila, mi ya va dhana va txi ta m'busoni votshe vale mi no va mana.

¹⁰ Sithumi si di humile tinzilani, si to tshanganisa avale si nga va mana, vo biha ni vavanene, amu nyumbani ka m'buso kala kuza yi tala nyumba ngu vale va nga rambwa.

¹¹ “Mbimo yi mfumeli a nga wulela kuya wona ava va nga ti khalahatshile kudyani, a to wona mmweyo m'thu, a nga sa ambala nguwo ya mtxhadho.

¹² A txi khene kwakwe: ‘Mndoni, u wulelisite kutxani ahawa, u sa ambala nguwo ya mtxhadho kani?’ Ene a so walo kaye.

¹³ Sekoko mfumeli a to khene ka sithumi: ‘Mu sungeni minenge ni mawoko, mi mu tshotsha txidemani ka hahanze, ahawa ku no va i di ka tihuwa ni kugegeresela ka makwasa.’

¹⁴ Kha ditshuri mbavangi va nga dhanwa, aniko mba dotho va nga sawulwa.”

Kuningela mkhupo ka Khezari

¹⁵ Sekoko Vafarisi, va di khukhile, va to ya langana, txikungoni, marindi a kuñola Jesu amu ka mapswi akwe.

¹⁶ Se va to m'rumela vagondiswa vawe ni va ka Herodha, va txi ya kha vona: “M'gondisi, ha tiziva ti to u na ni ditshuri ni ti to u gondisa nzila ya Txizimu ngu ditshuri, u si khatali ngu m'thu, nguko khu yi ngu txiemo txa m'thu.

¹⁷ Seni hi gele nga ti u ti wonisako tona: Ndinene kukhupa ka Khezari mwendo hi nga tinene kani?”

¹⁸ Aniko Jesu, a di woni kubiha kwawe, a to khene: “Njani mi txi ni duka, anu vaxengeteli, kani?

¹⁹ Hi ngani ni komba male yi mi khupako ngu yona.” Vona va to mkomba didhenari.

²⁰ Se Jesu a nje khene kwawe: “Mfananiso wuwa ni m'bhalo wuwa nza mani kani?”

²¹ Se vona va ti kha vona: “Nza Khezari.” Sekoko Jesu a to va xamula a txi khene: “Ningelani ka Khezari asi i ku sa Khezari, ni ka Txizimu asi i ku sa Txizimu.”

²² Ngako va di pfite mapswi awa, va to diwuka, ve khukha va txi tsula, ve mu siya.

Mhaka ya kuwuka ngu ka vafi

²³ Ka donedo ditshiku, va to ta kwakwe, Vasadhusi, va ku kha vona kha ku nga ho kuwuka ka vafi, va to mu wotisa,

²⁴ va txi kha vona: “M'gondisi, Mosi a ti khene: ‘Ngako m'thu a txi fa, a si nga ni vanana, mnanda wakwe a na sambele thaka msikati wakwe, a txi wusa mwaya wa mkomwakwe.’

²⁵ Sekoko hagari kwathu, ku ti ti ni mtxhanu wa vathu ni vambidi va txikoma ni txinanda. Wo khata a tekile msikati, se a txi fa, a sa nga va ni mwanana, a txi siya msikati ni mnanda wakwe.

²⁶ Ti mahisile toneto ka wa wumbidi ni ka wa wuraru, kala ka wa wutxhanu ni vambidi.

²⁷ Msana kwawe votshe, a fite nene wule wamsikati.

²⁸ Se kuwukani ka vakufa, awule wamsikati a na va i di kata mani kani, nguko votshe a tekani navo kani?”

²⁹ Jesu a to va xamula a txi khene: “Mi timete ngutu, nguko kha mi yi zivi Mibhalo ni mtamo wa Txizimu.

³⁰ Nguko, kuwukani ka vakufa, vathu kha va na mbiswa ve teka hambi kutekwa; aniko va na fana ni tingelozi ta nzumani.”

³¹ Se ngu mhaka ya kuwuka ka vafi, ina kha ma gonda ati txi nga womba Txizimu, txi txi kha txona:

³² “Ani ni Txizimu txa Abrahamu, Txizimu txa Isaake, Txizimu txa Jakobe kani? Txona hi nga Txizimu txa vafi, aniko Njizimu txa va va hanyako.”

³³ Se vathu va txi mu engisa, va to xamala ngu kugondisa kwakwe.

Txirumo txa hombe txa mlayo

³⁴ Ngako Vafarisi va di engisile ti to Jesu a konile Vasadhusi, va to rambana ve mu yela,

³⁵ se mmweyo wa vona, i nga ti txizivi txa mlayo, a to mu duka ngu txiwotiso a txi khene:

³⁶ “M'gondisi, ngu txihi txirumo txa hombe txa Mlayo kani?”

³⁷ Jesu a nje khene kwakwe: “ ‘Randa Mkoma Txizimu txako, ngu yotshe mbilu yako, ngu wotshe moya wako ni otshe mapimo ako.’

³⁸ Atxiya ngu txona i ku txirumo txa hombe txo khata.

³⁹ Txirumo txa wumbidi txi fanana ni txona txiya: ‘Randa muakelani wako nga ti u ti randisako tona awe upune.’

⁴⁰ Sirumo siya sa simbidi ngu sona i ku ditshina da wotshe Mlayo ni tigondo ta vaprofeti.”

Txiwotiso madingano ngu Mesiya

⁴¹ Ngako Vafarisi va di tshanganile, Jesu a to va wotisa,

⁴² a txi khene: “Mi pimisa txani anu ngu Mesiya, kani? Mwanana wa mani kani?” Vona va to angula va txi kha vona: “I Mwana Dhavhidha.”

⁴³ Se ene a to va gela ku khene: “Se ti mahisa kutxani Dhavhidha ngu kuwoningwa ngu Moya wo Sawuleka a m'dhanako ku i Mkoma ngu mapswi awa:”

⁴⁴ “Mkoma a wombile ka Mkoma wangu a txi khene: Khalahatsha ngu txineneni kwangu kala kuza ni khozisa valala vako ni txi va maha txikhigelo txa mikondo yako.”

⁴⁵ “Ngako Dhavhidha a m'dhanako ku Mkoma se ti nga mahisa kutxani kuva i di Mwanana wakwe, kani?”

⁴⁶ Kha ka maneka ni mmweyo a nga tiziva kuangula. Se kukhukhela koneho kuwalo ni mmwani a nga tsana kambe a txi mu wotisa.