Masalmo 95 - Bhiblia Yo Sawuleka

Ndando yo dhumisa Mkoma

¹ Ngonani hi ta dhumisa Mkoma ngu mikulungwani ya litsako; a hi huweleleni m'vhikeli ni muhanyisi wathu.

² A hi yeni masoni kwakwe, na hi txi embelela tindando ta kubonga a hi mu bongeni ngu kutsaka ngu tindando tathu.

³ Nguko Mkoma Njzimu txa hombe, kambe Mfumeli wa hombe txitimwi ka sotshe sizimu.

⁴ Mafu otshe ma manzani kwakwe; mikova ya kutshima ni mimango yo lapha nzakwe.

⁵ Linene li lumba ene, nguko ngene a nga li maha; mafu a kuoma ni ona i mthumo wa manza akwe.

⁶ Ngonani anu hi ta khozela ni kunama! A hi khizameni masoni ka Mkoma awu a nga hi vanga,

⁷ Ene i Txizimu txathu, se athu hi ngamu yakwe; hi tinvuta ta mtxhambi wu ene a wu dyisako. Nyamsi engisani dipswi da Txizimu:

⁸ “Mi nga bangiseni timbilu tanu, kufana ni vakale vanu ditikoni ka Meribha; ku nga ditshiku dile va nga ti txiwulani ka Masa,

⁹ mbimo yi vona va nga ni duka; va ni xote, aniko va woni mithumo yangu.

¹⁰ Mune wa magumi a malembe ni swirekile,” niza ni txi khani: “Vathu vava va timbilu tawe ta va timeta, kambe kha va si zivi sileleto sangu!”

¹¹ Ni manekile ni txi pandiseka ni za ni xambanya ni txi khani: “Vathu vava kha va na mbi wulela ka wukhalo wangu wa kuhumula.”