Masalmo 91 - Bhiblia Yo Sawuleka

Txizimu m'vhikeli wathu

¹ Awule a zumbako kusisalani ka Nyatxitimwi a na humula mtsudini ka Nyamitamo,

² Ni na khani: Mkoma Ngene Txizimu txangu, mbuthavelo wangu, mkhokhola wangu, ni na themba kwakwe!

³ Nguko Mkoma a na kuhulukisa ka mlawu wa mriyeli ni ka mtungu wu wu dayako.

⁴ Mkoma a na kufenengeta ngu mitenga yakwe, hahatshi ka tibhapi takwe u na maneka u di tsani; ditshuri dakwe njitxhavangu ni txitsaniso!

⁵ Khu na mbi thava tiphango ta wusiku, mwendo lingove lo khwinzwa ni mitshikari,

⁶ hambi mtungu wu wu hangalakako txidemani, ni malwati awa ma dayako ni mitshikari;

⁷ 1.000 wa vathu va na wa didhawa kwako, ni 10.000 txinene kwako, aniko awe khu na mbi hokelwa.

⁸ U na ti wona ngu maso ako dwe, u wona kutsayiswa ka vathu vo biha.

⁹ Nguko awe Mkoma, ngawe wuthavelo wangu! Nyatxitimwi mbukhalo wako wo zumba ka wona.

¹⁰ Khu na mbi manwa ngu dikhombo ni da dimwedo, hambi mtungu ni wawumwewo kha wu na mbi hoka ditendani kwako,

¹¹ Nguko Mkoma a na rumela tingelozi takwe kwako, kasi ku ta ku wonelela ka totshe tinzila tako.

¹² Tona ti na kuñola ngu manza a tona, kasi ku mkondo wako wu si ti gumuli ha dirigwini.

¹³ U na kandetela ngonyamo ni mnyoka; ni kukandetela ngu mikondo txingonyamwana ni mnyoka.

¹⁴ Nguko Txizimu txi kha txona: “Ni na hulukisa vale va ni randako, ni na va vhikela, nguko va ni ziva ti to ni Mkoma.

¹⁵ Ene a na ni dhana, se ani ni na mxamula; ngako a di kuxanisekani, ni na va kumweko nayo; ni na m'hulukisa, ni mpfalisa.

¹⁶ Ni na mninga kuhanya masiku amangi, kambe ni na mkomba kuhanyisa kwangu.”