Masalmo 89 - Bhiblia Yo Sawuleka

Kukhozela awu wa Mtamo-wotshe

Txirhokozelo txa Etani, muezira

¹ Awe Mkoma, ni na embelela lirando lako, kala kupinduka; ni na huwelela kuthembeka kwako ka liveleko ni liveleko.

² Ni na huwelela ti to lirando lako kha li nga ni magwito, ni ti to kuthembeka kwako kha ku nga ni magwito, kufana ni nzuma.

³ Awe u ti khawe: “Ni mahile txitumelelano ni msawuleki wangu, ni thembisile ka txithumi txangu Dhavhidha:

⁴ Liveleko lako li na simama li fuma yotshe mbimo ni na tsanisa wukoma wako ka liveleko ni liveleko.”

⁵ Tinzuma ta dhumisa sidiwukiso sako, Mkoma, ni msengeletano wo sawuleka wa dhumisa kuthembeka kwako.

⁶ I mani a ku nzumani a dinganako ni nawe, kani Mkoma? I mani, hagari ka sivangwa sa nzumani, a dinganako ni nawe, kani Mkoma?

⁷ Txizimu njo dingana kuthaviseka, ngutu msengeletanoni ka vasawuleki; txona nja hombe ni kuguletwa ngutu ngu votshe va txi randelako.

⁸ Mkoma, Txizimu txa mtamo wotshe, kuwalo wo fana ni nawe! Mtamo ni kuthembeka kwako si ku randete.

⁹ Awe wa fuma linene, ngako li txi kukumuka u txi tengisa mavimbi a lona, ngako ma txi vhiluka.

¹⁰ U ganyatete Rahabhi txingongongo txa lineneni, u txi daya; ngu mtamo wako wa hombe u hangalasile valala vako.

¹¹ Awe u Mkoma wa nzuma ni mafu, u vangile ditiko ni sotshe si si manekako ka dona.

¹² U vangile Wuphemba ni Wulambwe; mimango ya Tabhori ni Hermoni ya embelela ditina dako.

¹³ Diwoko dako di ni mtamo, dianza dako di tsani, dianza dako da txinene di ni wurena!

¹⁴ Mfumo wako wu tsanisilwe ngu kululama ni ditshuri, lirando ni ditshuri si ni nawe masoni kwako.

¹⁵ Va katekile vathu vale va zivako ku kudhumisa, Mkoma, avale va hanyako kuwonekelani ka khohe yako.

¹⁶ Otshe masiku va tsaka ngu ngawe va nengela ngu mhaka ya wunene wako.

Txithembiso txa Txizimu ka Dhavhidha

¹⁷ Kha ditshuri, awe u mtamo wathu ni wudhumo wathu; wurena wathu wa tsaniswa ngu wunene wako.

¹⁸ Nguko Mkoma m'vhikeli wathu. Kambe Msawuleki wa ka Israyeli, i ku ene Mfumeli wathu!

¹⁹ Kale u wombawombile ngu siwoniso ka sithumi sako so thembeka u txi khawe: “Ni ningile mtamo dizambi da ndena; ni fumisile dijaha, ni ngadi sawula hagari ka vathu vangu.”

²⁰ Ni mani Dhavhidha txithumi txangu; ni mmahile mfumeli ngu ku mtota mafura o sawuleka.

²¹ Mtamo wangu yotshe mbimo wu na va ni nene ni wukoma wangu wu na mtsanisa.

²² Valala kha va na mbi mkanganyisa hambi sigevenga kha si na mbi mxula.

²³ Ni na mbembemelisa valala vakwe masoni kwakwe; ni na lovisa avale va mrandelako!

²⁴ Kuthembeka kwangu ni lirando langu si na va ni nene; ngu ditina dangu wu na tsana wukoma wakwe.

²⁵ Ni na andisa wukoma wakwe txitimwi ka linene ni mfumo wakwe txitimwi ka minambo.

²⁶ Ene a na ni dhana, a txi khene: “Awe u tate wangu, u Txizimu txangu, txi txi ni hanyisako ni ku ni vhikela.”

²⁷ “Ani ni na mninga tifanelo ta mwanana wa matiwula; a na fuma txitimwi ka vafumeli va ditiko.

²⁸ Wumbilu wangu ni nene wu na simama kala kupinduka ni txitumelelano txangu txi na tsana yotshe mbimo.

²⁹ Ni na maha ti to lihunzu lakwe li simama kala kupinduka, li txi fuma ngu malembe ni malembe kufana ni nzuma.

³⁰ Ngako liveleko lakwe li txi leka mlayo wangu, ngako va si tsimbili madingano ni sileleto sangu,

³¹ ngako va txi ndaka mithetho yangu va si vekisi sirumo sangu,

³² koneko, ni na tsayisa sionho sawe ngu ndonga, ni txi va khawulisa wubihi wawe ngu sisephu.

³³ Aniko kha ni na mbi leka kuranda Dhavhidha, kha ni na mbi leka kumaha sithembiso sangu kwakwe.

³⁴ Kha ni na mbi funya txitumelelano txangu, hambi kutshumeta sixambanyo si ni nga si maha.

³⁵ Ni xambanyile kumweko ngu wusawuleki wangu kha ni na mbi m'dyelela Dhavhidha.

³⁶ Situkulwana sakwe si na fuma kala kupinduka, txikhalo txakwe txa wukoma txi na simama masoni kwangu nga ditambo;

³⁷ txi na zumba txi di tsani yotshe mbimo, nga mtxima, i ku fakazi ya kuthembeka yi ku nzumani.”

Kuxulwa ka mfumeli

³⁸ Hambi keto, awe Mkoma, u henyete msawulwa wako; u karate ngu ngene u txi mtsukula.

³⁹ U tshotshile txitumelelano txi u nga ti natxo ni txithumi txako; u tshotshile hahatshi m'bhoti wakwe.

⁴⁰ U khundumusile otshe maguma a didhoropa; u mahile marumbi mikhokhola ya kona.

⁴¹ Votshe vapindi va nzila va wulela ve handa; vaakelani vakwe va mxowokisela.

⁴² U ningile wudhundo ka diwoko da txinene da valala vakwe, u tsakisile valala vakwe votshe.

⁴³ U pinyetile kuhinda ka ditxhari dakwe kambe khwa mtsanisa kulwani.

⁴⁴ U txhipisile wudhumo wakwe; u txi wisa hahatshi txikhalo txakwe txa wukoma.

⁴⁵ U komisile masiku a wuphya wakwe; u mfenengetile ngu tingana.

Kukombela kutxhatxhiswa

⁴⁶ Mkoma, kala mbimo muni, u na ti sisa kala kupinduka kani? Txiviti txako txi na tura nga mndilo yotshe mbimo kani?

⁴⁷ Alakanya, Mkoma, ti to wutomi wangu wu komile! Votshe vathu, u nga va va nga, va pinda ngu kukuluveta.

⁴⁸ Ina waho m'thu wo mbi fa kani? I mani a no sikota kuhuluka ka mtamo wa lifo kani?

⁴⁹ Mkoma, li hani lirando lako la kale, lirando li u nga xambanyela Dhavhidha ngu kuthembeka kwako kani?

⁵⁰ Alakanya, Mkoma, siruko so wukela txithumi txako; ni rwate hakhana kwangu siruko sa yotshe mifumo,

⁵¹ asi valala vako va hi onhelako ngu sona, Mkoma! Hani ni hani a yako kona msawulwa wako, va mruka!

⁵² A na dhumiswe Mkoma kala kupinduka. Amen! Ni Amen!