Masalmo 87 - Bhiblia Yo Sawuleka

Jerusalema didhoropa da Txizimu

Disalmo da mtxawa wa Kora. Ndando.

¹ Mkoma a akile didhoropa dakwe txitimwi ka mmango wo sawuleka.

² Ene wa di dhunda didhoropa da Jerusalema, wa ma dhunda matimba a Siyoni. Kupinda tinyumba totshe ta ka Jakobe.

³ Awe didhoropa da Txizimu, ta tsakisa ngutu ati Txizimu txi wombawombako, na txi txi dhumisa awe:

⁴ “Hagari ka mifumo yi yi ni zivako ni na bala Egipta ni Bhabhilona; vathu va Filisitiya ni va Tiro ni va Etiyopiya va na wombwa ku va veleketwe Jerusalema.”

⁵ Vathu, va txi womba-womba ngu Jerusalema, va na kha vona: “Votshe vathu va veleketwe koneyo; kambe ngene Nyatxitimwi a tsanisako toneto.”

⁶ Txizimu txi na bhala matina dibhukuni, txi txi womba ti to awuwa a veleketwe koneyo.

⁷ Ava va embelelako ni va va sinyako va na kha vona: “Txisima txa otshe makatekwa athu txi maneka kwako.”