Masalmo 86 - Bhiblia Yo Sawuleka

Kukombela kulamulelwa ngu mbimo ya kuxaniseka

Mkombelo wa Dhavhidha

¹ Ni engise, Mkoma, u txi ni xamula, nguko na xaniseka, ni txisiwana.

² Ni vhikele, Txizimu, nguko ni thembekile kwako; hanyisa txithumi txako txi txi kuthembako!

³ Mkoma, telwa ngu wumbilu ngu ngani, nguko na dila masoni kwako txotshe txikhati.

⁴ Mkoma, tsakisa moya wa txithumi txako, nguko mkombelo wangu ni wu tisa kwako.

⁵ Nguko awe, Mkoma, u wamnene, wa divalela; wa amukela ngu mbilu votshe vale va ku khozelako.

⁶ Mkoma, engisa mkombelo wangu, amukela huwa ya txikombelo txangu!

⁷ Ngako ni txi pfa kupandiseka, ni dila kwako, na ni txi themba tito, u na xamula mkombelo wangu.

⁸ Kha si nga ho sizimu si si dinganako ni nawe, Mkoma; kuwalo wu a sikotako kumaha ati awe u mahako.

⁹ Mkoma, awe u mahile mifumo yotshe, se yona mifumo ya ta masoni kwako yi ta dhumisa ditina dako.

¹⁰ Nguko ngawe wekha u ku Txizimu! Ngawe u ku wa hombe, u mahako sidiwukiso!

¹¹ Ni gondise, Mkoma, nzila yako, kasiku ni yi londisa ngu yotshe mbilu. Maha ti to mbilu yangu yi dhumisa ditina dako.

¹² Ni na kudhumisa, Mkoma, Txizimu txangu, ngu yotshe mbilu yangu; ni na pfalisa ditina dako kala kupinduka,

¹³ nguko wunene wako mbwa hombe kwangu; u ni ponisile ka diphala da lifo!

¹⁴ Txizimu, vathu va kutiguleta va ni wukela; mtxawa wa vanyamitamo wu lava ku ni daya, kha va khatali ngu ngawe.

¹⁵ Aniko awe, Mkoma, u Txizimu txa wunene ni wumbilu, u wa kutimisela, u di tate ngu wunene ni kuthembeka.

¹⁶ Ni wone, u txi ni pfela wusiwana; ni he mtamo wako, u txi ta u ta ni lamulela; ani ni txithumi txako kufana ni mame i nga ti txithumi txako.

¹⁷ Ni mahele txikombiso txa wunene wako, kasiku valala vangu ve txi wona, ve thelwa tingana, ngako va txi wona ti to awe, Mkoma, wa ni vhuna ni ku ni tsanisa!