Masalmo 84 - Bhiblia Yo Sawuleka

Kuxuva nyumbani ka Txizimu

Disalmo da mtxawa wa Kora. Ka mthangeli wa vaembeleli-ngu mpfumawulo wa “Sigowolo.”

¹ Ya tsakisa ngutu nyumba yako yo sawuleka, Mkoma wa Mabutho a Tiyimbi!

² Moya wangu wa navela ni kuxuva siluvelo sa Mkoma; yotshe mbilu yangu ya embelela ngu kutsaka ka Txizimu txi txi hanyako!

³ Hambi sindili sa mana ko sisala ni timbeluvelu ti ni sisaka, si nga ti akela kasi si zumba ka sona, ni vanana va sona, hafuhi ka siluvelo sako, Mkoma wa Mabutho a Tiyimbi, Mfumeli wangu ni Txizimu txangu.

⁴ Va katekile vale va zumbako nyumbani kwako va ku dhumisako yotshe mbimo.

⁵ Va katekile vale va manako kuvhunwa ngu ngawe, avale va navelako kutsimbila kala mmangoni ka Siyoni.

⁶ Ngako va txi tshawunyeta mkova wa kuoma, wa hinduka wu maha wukhalo wa milonga, ngu kunelwa ngu mati o khata a nzuma, kumaneka sisima so tala.

⁷ Vona va tsimbila na mtamo wu txi engetelwa ditshiku ni ditshiku kala veya ti kombisa Siyoni masoni ka Txizimu.

⁸ Mkoma, Txizimu txa Mabutho a Tiyimbi, engisa mkombelo wangu; ni engise, awe Txizimu txa Jakobe!

⁹ Awe Txizimu, katekisa mfumeli wathu, awu a nga sawulwa ngu ngawe.

¹⁰ Ndinene ngutu kuzumba ditshiku dimwedo nyumbani kwako, kupinda kuzumba digumi da mazana a masiku hahanze! Ni randa kuzumba ha txikeni ka Nyumba ya Txizimu txangu kupinda kuzumba matendani ka vabihi.

¹¹ Nguko Mkoma liwoningo lathu ni m'vhikeli wathu; ene wa randa ni kudhunda avale va hanyako ngu kululama kha va lambeli ni txa tximwetxo tximaha txa txinene.

¹² Mkoma wa mtamo wotshe, va katekile avale va kuthembako!