Masalmo 82 - Bhiblia Yo Sawuleka

Txizimu mlamuli wa votshe

Disalmo da Asafe

¹ Txizimu txi khalahatshile msengeletanoni ka nzumani; txi lamula hagari ka sizimu txi txi kha txona:

² “Mi na leka ditshiku muni kulamula ko soholoka ni kuemela vabihi kani?

³ Emelani sikulungu ni va vo felwa ngu vaveleki; lamulani ngu kululama ava vo xaniswa ni sisiwana!

⁴ Hanyisani ava va xaniswako ni sisiwana, mi txi va hulukisa manzani ka vabihi!

⁵ Vona vabihi kha va zivi, kambe kha va pimisi; va hanyela txidemani. Ngu konaho, asi si tsanisako mafu sa tsekatseka!

⁶ Ani ni wombile ni txi khani: Anu mi sizimu, kambe anu vamwani motshe mi vanana va Nyatxitimwi.

⁷ Hambi keto, mi na fa kufana ni votshe vathu; kambe mi na wa kufana ni wuhi mthangeli.”

⁸ Ngono, Txizimu, u ta lamula mafu, nguko otshe matiko ma lumba awe!