Masalmo 77 - Bhiblia Yo Sawuleka

Thavelelo ka timbimo ta kupandiseka

Disalmo da Asafe. Ka mthangeli wa vaembeleli-kasi kutisola.

¹ Na kwangula ka Txizimu ngu dipswi da mtamo, na dila ka Txizimu kasiku txona txi txi ni engisa.

² Mbimo ya sikarato, na kombela ka Mkoma; ni wusiku, na guleta manza angu ni txi khongela, ni si karali; moya wangu kha wu mani thavelelo.

³ Ngako ni txi alakanya Txizimu, na dila; ngako ni txi pimisela na guma mtamo.

⁴ Awe Txizimu khu ni leki ni txi mana wukohe, na karateka ngutu, ni pwata ni dipswi do kuangula!

⁵ Na khumbula masiku awa ma nga pinda, na alakanya malembe a kale.

⁶ Ni wotshe wusiku na pimisela mbiluni kwangu; mbiluni kwangu na alakanyela, ni txi ti wotisa ani nipune, ni txi khani:

⁷ “Mkoma a nga va a txi hi tsukula do gwita kani? Kha na mbiswa e hi themba kambe kani?

⁸ A nga va ene a di lekile ku hi randa kani? A nga va a di lekile txithembiso txakwe ka liveleko ni liveleko kani?

⁹ Txizimu txi nga va txi di divate wumbilu wa txona kani? Txi nga va txi di henyile ngutu aha koza wunene wa txona wu va wu di gumile kani?”

¹⁰ Sekoko, ani ni ti khani: “Ati ti ni pandisako ngutu ngu ti to Nyatxitimwi khaswi e hi khatalela kufana ni kale.”

¹¹ Mkoma, ani na alakanya simaho sako so xamalisa; na alakanya sidiwukiso si u nga si maha kale.

¹² Ni na alakanya yotshe mithumo yi u nga yi maha ni womba-womba ngu sidiwukiso sako.

¹³ Awe Txizimu, sotshe si u nga si maha si sawulekile; kuwalo Txizimu txi i ku txa hombe kupinda Txizimu txathu.

¹⁴ Awe u Txizimu txi txi mahako sidiwukiso; u wonekisile mtamo wako ka votshe vathu.

¹⁵ Ngu mtamo wako u ponisile vathu vako, i ku liveleko la Jakobe ni la Josefa.

¹⁶ Mbimo yi linene li nga kuwona awe Txizimu, li to thava; ni kutshimani ka mati ku to dhudhumela.

¹⁷ Marefu ma to wisa mati a ona; kudhuma ka singwalangwanda ku to pfala nzumani ni tinyangafula tako ti to humelela ka otshe madhawa.

¹⁸ Kudhuma ka singwalangwanda sako ku to pfala txitimwi kukeluka ka nzuma ku to woningeta ditiko dotshe; mafu ma to dekadeka ma txi dhudhumela.

¹⁹ U tute nzila yako hagari ka linene; u tsimbila ngu hagari ka mati o khulunga, aniko ni wammweyo kha nga wona mkondo wako.

²⁰ U tsimbitisile vathu vako kota m'dyisi wa mtxhambi, ngu manza a Mosi ni Aroni.