Masalmo 74 - Bhiblia Yo Sawuleka

Awe Txizimu, alakanya vathu vako

Wuembeleli wa Asafe

¹ Txizimu, ngu kutxani u nga hi tshotsha ka yotshe mbimo kani? Ngu kutxani u hi henyela athu hi ku mtxhambi wa tinvuta ati awe u ku m'dyisi wa tona kani?

² Alakanya vathu vako, ava u nga va sawula kukhukhela ka kale, vathu va tihunzu ti u nga ti tirula kasiku ti txi kulumba, alakanya mmango wa Siyoni, aha u zumbako kona.

³ Ngono u ta wona marumbi o mbi na magwito; mlala a handile sotshe nyumbani kwako ko sawuleka!

⁴ Valala vako va embelete tindando to giya nyumbani kwako ko sawuleka; va txi gwimba mijeke yawe konamo, yi maha txikombiso.

⁵ Ha txikeni ka txitimwi va bhandisete mapulango ve ma gangela ngu nzanga.

⁶ Va fayetete matimba a kona, ngu kupeketela ngu tihamela ni sigomba.

⁷ Va hisile nyumba yako yo sawuleka ve yi nyenyezisa, va txi wisa hahatshi nyumba yako.

⁸ Va akile txikungo timbiluni kwawe, va txi kha vona: “He va fuviseni ngu txikhati tximwetxo” ve hisetela otshe makhalo o khozela ka ona Txizimu, ditikoni kwathu.

⁹ Se kha ku nga ho sidiwukiso hagari kwathu, kambe kha ku nga ho vaprofeti, ni wammweyo kha ti zivi ti to atiya ti na simama kala mbimo muni!

¹⁰ Awe Txizimu, mlala a na simama e hi ruketela kala mbimo muni kani? A na poyilela ditina dako kala ditshiku muni kani?

¹¹ Ngu kutxani u txi sisa dianza dako da mtamo kani? Ngu kutxani u txi khutarela mawoko ako kani?

¹² Txizimu, kukhukhela ka mbimo ya kale u Mkoma wangu; u xute valala sikhati so tala ka diya ditiko.

¹³ Awe, Txizimu, u abanisile linene ngu mtamo wako; u ganyatete misungo ya vamwamilambo va linene.

¹⁴ U bhandisete misungo ya Levhiyatani u txi mningela e dyiwa ngu sihari sa txiwulani.

¹⁵ U khulongisile sisima ni milonga u txi womisa minambo ya mati a mtamo.

¹⁶ Wusiku ni mitshikari si lumba awe; u vangile mtxima ni ditambo.

¹⁷ U vekile mihingano ka mafu otshe u mahile malanga ni wuxika.

¹⁸ Alakanya, Mkoma, ti to mlala wa kuruketela ni vathu va sipumbu va poyilela ditina dako.

¹⁹ U nga ningele dihika da txituvani txako ka sibanda; u nga divale vathu vako va sisiwana; u nga va ningele nga txituvani, ka mijebe ya nyamatate.

²⁰ Alakanya txitumelelano txako, nguko ditiko kheno ni kheno di tate ngu makhalo a wugevenga.

²¹ U nga tumele ti to ve xowokiswa ava va xaniswako, maha ti to txisiwana ni txikulungu va txi kudhumisa.

²² Wuka awe Txizimu, vhikela mhaka yako! Alakanya ti to vathu vo mbi ziva va kuonhela yotshe mbimo!

²³ U nga divale miketo ya valala vako: Likwaha la vale va ku wukelako ditshiku ni ditshiku.