Masalmo 73 - Bhiblia Yo Sawuleka

DIBHUKU DA WURARU ( Masalmo 73--89 ) Wululamo wa Txizimu

Disalmo da Asafe

¹ Kha ditshuri Txizimu njinene ka vathu va ka Israyeli, ka va vo basa timbilu!

² Mikondo yangu yi ti lava ku ni timeta, kudotho ni ti lava ku rithimuka.

³ Ani ni ti bavela ava va kutikulisa, ngu kuwona kuzumbiseka ka vabihi.

⁴ Nguko kha va na sixaniso kala kufani, va hanya kwati, va txi ena.

⁵ Kha va xupheki ngu sikarato kuhanyani kwawe, kha va na sixaniso kufana ni vamwani vathu.

⁶ Kutiguleta kwawe ku va randete nga wusekenya mkoloni va thumisa wurena nga bombo.

⁷ Timbilu tawe ti tate ngu wubihi ti txi thekelela se misungo yawe yi tate ngu mialakanyo yo biha.

⁸ Va poyilela va txi womba-womba kubiha, va txi kha vona kwa mbi lulama kuta ngu ka Txizimu.

⁹ Va guleta mapswi ve wukela Nyatxitimwi va womba-womba kubiha ngu vathu va ha mafuni.

¹⁰ Ngu toneto, valondeteli vawe va va dhunda ve engisela kwati mapswi awe.

¹¹ Va txi kha vona: “Txi nga ti zivisa kutxani Txizimu tonti; ina Nyatxitimwi ova ni wuzivi kani?”

¹² Ndiva vathu vo biha: Va zumbisekile, va sengeletela tithomba, va si khatali ngu Txizimu.

¹³ Kha ditshuri, kha ta vhuna txilo kubasisa mbilu yangu ni ku va ni manza o basa ka totshe to biha!

¹⁴ Ditshiku ni ditshiku ni wo xaniseka; mixo ni mixo ni wo tsayiswa.

¹⁵ Idiku ni to londisela tawe, nga ni di khuvekisile liveleko la vanana vako.

¹⁶ Mbimo yi ni nga kulava ku ti pimisa tiya, ti manekile ti txi ni karatela.

¹⁷ Mbimo yi ni nga wulela nyumbani ko sawuleka ka Txizimu, ngu kona ni nga tumbula magwito awe.

¹⁸ Ngu ditshuri u va vekile ka wukhalo wo rithimuka, u va tshotshile kuva ve khundumuswa

¹⁹ Ngu txidhukisa va na fuviswa! Votshe va na guma ngu kuthava!

²⁰ Nga ti a mahako m'thu ngu mloro, a txi wuka, na nawe, Mkoma, u txi na wuka, u na nyenya ni txithuzi txawe.

²¹ Mbilu yangu yi pandisekile ni so thelwa mphume mapimoni kwangu;

²² ni manekile ni di txipumbu ni si zivi txilo. Ni txi nga no va txihari masoni kwako!

²³ Hambi keto ni ni nawe yotshe mbimo; awe wa ni setela ngu diwoko.

²⁴ Ngawe u ni tsimbitisako ngu mlayo wako u na ni amukela kudhumiswani kwako.

²⁵ I mani ni ku nayo nzumani, hahanze kwako kani? Ha mafuni ani ni navela kuzumba ni nawe dwe.

²⁶ Hambi ngako mmidi wangu wu txi karala, Txizimu ngu txona txi ningako mtamo mbilu yangu; ngu txona i kuthomba yangu yo mbi guma.

²⁷ Nguko ava va zumbako kule ni nawe va na lova; awe wa va fuvisa votshe vale va ku phikizako.

²⁸ Aniko kwangu, ndinene kuzumba hafuhi ka Txizimu. Awe, Mkoma, Txizimu txangu, u wuthavelo wangu; ni na huwelela totshe ti u nga maha.