Masalmo 72 - Bhiblia Yo Sawuleka

Mkombelo wo kombelela mfumeli

Disalmo da Solomoni

¹ Txizimu, ninga mfumeli wa ditiko kululama kwako ni wunene wako ka mwanana wa mfumeli,

² kasiku e thethisa vathu vako ngu kululama ni kuxayisa sisiwana ngu kululama.

³ Mimango yi na tisa kudikha vathuni, ni simangwana si na tisa kululama.

⁴ Mfumeli a na vhikele sisiwana sa ditiko; e vhuna sisiwana ni kuganyatela vaxanisi!

⁵ Ene a na hanye masiku o lapha, ngako ditambo ni mtxima si di ngadi ho, ka liveleko ni liveleko!

⁶ Mfumeli a na fane ni mati ma wako tithembweni, e fana ni mapshwi ma nakanisako mafu!

⁷ Kudikha ni kululama si na tale kufumani kwakwe si na simame si diho, mtxima wu txi ngadi wu woninga!

⁸ Ene a na fume kukhukhela ka limbe linene kala ka limwani, kukhukhela ka mnambo wa Ewufrate kala magemeta-mitshi ka mafu.

⁹ Vathu va txiwulani va na nama masoni kwakwe; valala vakwe va na ti wisa ha mafuni masoni kwakwe!

¹⁰ Vafumeli va Tarxixi ni va sitondolo va na m'luva; vafumeli va Sabha ni va Sebha va na rumela tinduvo!

¹¹ Vafumeli votshe va na ti namisa masoni kwakwe; yotshe mifumo yi na mthumela!

¹² Ene a na hulukisa txisiwana txi txi m'dhanako ni txikulungu txi txi ku si nga ni m'vhuni.

¹³ A nava ni wumbilu ka va vo ti veka hahatshi a na hanyisa muhefemulo wa sikulungu.

¹⁴ A nava hulukisa wukhumbini ni kuxaniswani, nguko wutomi wawe wu ni lisima kwakwe.

¹⁵ A na hanye mfumeli! Va na mninge nzalama ya Sabha! Va na mkombelela ngu ha ku si gwitiko, otshe masiku ku na kombelwa ka Txizimu ti to txi mkatekisa.

¹⁶ Ditiko di na talelwe ngu kupfuna ka fulaho, ayi yi zinginikelako txitimwi ka situnga, yi veleka mihando kufana ni Libhanoni ava va nga aka madhoropani va na rumbuka kufana ni mwasi wu nga mila ha mafuni!

¹⁷ Ditina da mfumeli di na simame yotshe mbimo; nduma yakwe yi na simame hahatshi ka ditambo kala kupinduka! Ngu mhaka yakwe yotshe mifumo yi na katekiswe otshe matiko ma na mu womba ku a katekile.

¹⁸ Txi na dhumiswe Txizimu, Mkoma i ku Txizimu txa ka Israyeli, txona txokha txi mahako sidiwukiso.

¹⁹ Di na dhumiswe yotshe mbimo ditina da txona da wudhumo ni dotshe ditiko di na tale ngu wudhumo wa txona! Amen! Amen!

²⁰ Ahawa i magwito a mikombelo ya wuembeleli wa Dhavhidha, mwanana wa Jese.