Masalmo 68 - Bhiblia Yo Sawuleka

Txizimu txa ninga kuxula

Ka mthangeli wa vaembeleli. Disalmo ni ndando ya wuembeleli wa Dhavhidha

¹ Mbimo yi Txizimu txi wukako, valala va txona va hangalaka; avale va txi zondako va txi thava;

² va mwalala nga wutshi hagari ka mpfhuka, va nyivilika nga phula ha mndiloni. Ngu tonti vathu vo biha va fisako tona, masoni ka Txizimu!

³ Aniko vavanene va tsaka masoni ka Txizimu, va maha migiyo, va giringa ngu kutsaka!

⁴ Embelelani ka Txizimu, embelelani tindando mi dhumisa ditina da txona, dhumisani awule a tsimbilako txitimwi ka marefu. Ditina dakwe i Txizimu! Tsakani masoni kwakwe!

⁵ Txizimu txi zumbako mu Dithepeleni ka txona ko sawuleka, i tate wa sikulungu, kambe m'vhikeli wa tinoni.

⁶ Txizimu txa komba ka txikulungu wukhalo wa kuhanya ka wona txa txhatxhisa avale i ku vo sungwa; aniko vakanganyisi va na hanyela ditikoni ko oma.

⁷ Txizimu, mbimo yi u nga huma u txi thangela masoni ka vathu vako, u txi tshawunyeta navo txiwula,

⁸ mafu ma to dekadeka, se mati me wa ngu nzumani, ngu mhaka ya kuva txi diho Txizimu txa Sinayi, ngukuva a diho Mkoma, Txizimu txa Israyeli.

⁹ Awe Txizimu, awe u mahile ma txi na mati ngu mtalo; u wusetile mafu awa i ku ako.

¹⁰ Vathu vako va akile kona ha mafuni; se awe, Txizimu, u tsanisile txisiwana ngu wunene wako.

¹¹ Mkoma a leletile dipswi, se vavasikati vavangi ve huwelela mahungu awa:

¹² “Vafumeli ni mabutho awe ndivale va thava, m'tini vavasikati va phakelana sile si nga honyolwa ka mlala.”

¹³ Hambi mi di otete sibalani ka sifuyo sanu. Mabhapi a situvani ma pometwe ngu silivhela ni mitenga ya sona ya phatima nga nzalama.

¹⁴ Ngako awule wa Mtamo-wotshe a txi hangalasa wukoma, konako hunguva yi ti ti wa mmangoni ka Salmoni.

¹⁵ Mimango ya Bhasani yi laphile ngutu! Titshoka ta yona ti gulekile ngutu!

¹⁶ Anu mimango yo demba, ngu kutxani mi wona ngu kubavela mmango wu Txizimu txi nga wu sawula kasi kumaha dizumbo da txona kani? Mkoma a na zumba ka wona kala kupinduka!

¹⁷ Sikotxikani sa Txizimu magumi mambidi a ma 1.000 a ma 1.000 ni ma 1.000; Mkoma a tile ngu Sinayi a txi ta wukhaloni ko sawuleka.

¹⁸ Awe u kwete txitimwi u tsulisile khumbi wukhumbini, u amukete nduwo ka vathu; hambi ni vaeyisi va khozile kwako, Mkoma!

¹⁹ A na dhumiswe Mkoma, ditshiku ni ditshiku; ene a hi ponisile; Txizimu i muhanyisi wathu!

²⁰ Txizimu txathu, Njizimu txa kuhanyisa; se ka Mkoma Txizimu ku ni mtamo wo hulukisa ka lifo.

²¹ Kambe Txizimu txi na fayetela ngutu misungo ya valala va txona ni sikwakwa sa didzidzi, sa vale va omelelako minanduni kwawe.

²² Mkoma a wombile a txi khene: “Ni na tisa ngu Bhasani valala vako, ni na va tisa ngu hahatshi ka linene.

²³ Ngu toneto, u na nakanisa mikondo mu ka mnoha wawe se sirumbi sawe si na va i di sakudya sa timbwa tako.”

²⁴ Txizimu, va ku woni kutsimbila kwako, kutsimbila ka Txizimu txangu ni mfumeli wangu, mbimo yi a wulelako txiluveloni kwakwe ko sawuleka.

²⁵ Vaembeleli va thangela masoni ni vaveti va sivetaveta msana; hagari ka vona ku ni mahorana, ma vetako singomana.

²⁶ Dhumisani Txizimu misengeletanoni! Vathu votshe va ka Israyeli va na dhumise Mkoma!

²⁷ Wonani! Masoni kuthangela Bhenjamini, wa lihunzu la lidotho; ngu msana, tinduna ta Judha kumweko ni vathu vawe, va londetelwako ngu tinduna ta Zebhuloni ni ta Naftali.

²⁸ Txizimu, komba mtamo wako, mtamo wu u nga hi vhuna ngu wona athu.

²⁹ Dithepele dako di maneka Jerusalema; vafumeli va tsula koneyo va txi ya ku mahela siningo.

³⁰ Kawuka mawuti a titshavani, mtxhambi wa hombe wa tikuzi ni marole a kona a vathu va ganyatelako siya sawe sa silivhela ngu mikondo ve hangalasa vathu va va dhundako yimbi!

³¹ Ngu Egipta ku nata tinganakana; Vaetiyopiya va na guleta manza ve khongela ka Txizimu.

³² Embelelani ka Txizimu, vathu va mafu, embelelani tindando ka Mkoma.

³³ Ka wule tsimbilatsimbilako a di gadhile tinzuma ta tinzuma, kukhukhela kaleko! Wona taku wa rumela dipswi dakwe ni kuninga kudhinda ko thisa ngutu.

³⁴ Zivani mtamo wa Txizimu. Wuhombe wa txona wa tshanganisa ditiko da ka Israyeli; mtamo wa txona wa eneta kotshe kuanama ka tinzuma.

³⁵ Txizimu txa thaviseka txiluveloni ka txona ko sawuleka, Txizimu txa ka Israyeli txi ningako mtamo ni wukoma ka vathu va txona! Txi na dhumiswe Txizimu!