Masalmo 64 - Bhiblia Yo Sawuleka

Kukombela kuvhikelwa masoni ka valala

Disalmo da Dhavhidha. Ka mthangeli wa vaembeleli.

¹ Engisa awe Txizimu, dipswi dangu ka mkombelo wangu; hulukisa wutomi wangu ka kuthaviselwa ngu valala vangu.

² Ni lwele ka sikungo sa vabihi; ni ponise ka vathu vo biha va ni riyelako.

³ Vale va nga lota tidimi tawe kufana ni matxhari va txi khwinza mapswi a livengo nga tingove.

⁴ Va baramela m'thu wo va a si nga ni mnandu, va txi m'hophosa ngu txidhukisa va si kanakani.

⁵ Va kujetelana hagari kwawe kumaha to biha; ve riya milawu ve yi sisa na va txi pimisa ti to kha nga ho wu a va wonako,

⁶ ti to ni wammweyo kha na mbi tumbula wubihi wawe. Aniko awule a zivako hambi ni mipimiso ya hakhana ni minavelo yo sisala, a na tumbula totshe.

⁷ Aniko Txizimu txi na khwinza tingove ta txona ha mimidini kwawe se ngu txidhukisa txi na va fula;

⁸ va na wiswa tingana ngu mapswi awe mapune se avale va no va wona va na va tseketsela.

⁹ Votshe va na thava, se va na xawuta mtamo wa Txizimu va txi pimisa ati txona txi nga ti maha.

¹⁰ M'thu wamnene a mana litsako lakwe ka Mkoma wa lava kuvhikelwa ngu ngene; se votshe vathu va kululama va na tsaka.