Masalmo 63 - Bhiblia Yo Sawuleka

Ditora da ka moya

Disalmo da Dhavhidha. Yi nga bhalwa a di txiwulani ka Judha.

¹ Txizimu, awe u Txizimu txangu! Na kulava ni si karali! Moya wangu wu na ni ditora ngu ngawe; wotshe mmidi wangu wa kunavela, ku nga mafu a ligwangwa, o oma ma ku si nga ni mati.

² Ni lava ku kuwona u di txiluveloni kwako ni wonetela mtamo wako ni wudhumo wako,

³ nguko lirando lako nda lisima ngutu kupinda wutomi! Ni na kudhumisa ngu txisofu txangu

⁴ ni na ku bonga otshe masiku a kuhanya kwangu; ni na guleta manza angu me komba kwako ngako ni txi khongela.

⁵ Moya wangu wu na maneka wu txi tsaka; nga ni to dya sakudya so tshamba. Txisofu txangu txi na kudhumisa ngu kutsaka.

⁶ Mbimo yi ni nga otela na kukhumbula; ngako ni di wukile, na kualakanya ngutu,

⁷ nguko awe u m'vhuneteli wangu. Ni na embelela ngu kutsaka ni di hahatshi ka mabhapi ako!

⁸ Moya wangu wu patanile ni nawe, se dianza dako da ni tsanisa.

⁹ Avale va lavako ku ni fuvisa va na wa diphalani ko hokoma.

¹⁰ Vona va na fa ngu ditxhari va na dyiwa ngu sihari sa txitinga!

¹¹ Aniko mfumeli a na tsaka ngu ka Txizimu; va na embelela sidhumiso ava va xambanyako ngu txona, aniko vawombi va makuhu va na malatwa.