Masalmo 62 - Bhiblia Yo Sawuleka

Hahanze ka Txizimu dwe

Disalmo da Dhavhidha. Ka mthangeli wa vaembeleli-kasi kutisola.

¹ Moya wangu wu themba Txizimu dwe; kuhanyiswa kwangu kuta ngu ka txona.

² Txizimu ngu txona txokha i ku m'vhikeli wangu ni Muhanyisi wangu. Kha ni na mbi dekadekiswa, nguko txona mbuthavelo wangu.

³ Mi na gwita mbimo muni kuwukela m'thu kasi ku m'daya, ene wu a fanako ni diseta di di lavako kuwa mwendo ku nga diguma da marumbini kani?

⁴ Mi alakanya wurena dwe mi thumisa makuhu kufela kudaya. Ma dhumisa ngu txisofu txanu, aniko ngu mbilu ma ruketela.

⁵ Moya wangu wu themba Txizimu dwe; kuthemba kwangu kuta ngu ka txona

⁶ Txizimu ngu txona dwe i ku dirigwi dangu ni m'hanyisi wangu; ngu txona i ku m'vhikeli wangu; kha ni na mbi dekadekiswa.

⁷ Kuhanyiswa kwangu ni wudhumo wangu si ka Txizimu; txona m'vhikeli wangu ni wuthavelo wangu.

⁸ Votshe va na themba txona Txizimu yotshe mbimo va txi txi dhumisa ngu yotshe mbilu! Txizimu mbuthavelo wathu!

⁹ Kha ditshuri, vathu va hahatshi mbukanganyisi, se vathu va dihanyo do guleka mba makuhu; va txi vekwa votshe ha txikaloni, kha va nemeli kupinda wukanganyisi.

¹⁰ Mi nga thembeni wukhinyavezi, mwendo ku ti kanganyisa ngu sile i ku sa walo. Ngako mi txi wona tithomba tanu ti txi tala, mi nga vekeni timbilu tanu ka tona.

¹¹ Ka sikhati sasingi ni engisile mapswi awa Txizimu txi nga womba txi txi kha txona: “Mtamo wu lumba Txizimu.”

¹² Ni wona wunene mbwako, Mkoma u hakelako m'thu, madingano ni mithumo yakwe.