Masalmo 58 - Bhiblia Yo Sawuleka

Txitsayiso ka vobiha

Ndando ya Dhavhidha. Ka mthangeli wa vaembeleli ngu wuembeleli waku “U nga Khundumuse”

¹ Anu vafumeli, ina ma lamula timhaka ngu nzila yo lulama kani? Ni kuthethisa vathu ngu nzila yo lulama kani?

² Aniko, mi luka makuhu mbiluni, mi wusa mazunga ha ditikoni ngu manza anu.

³ Vobiha va ti hambukisile kukhukhela kuvelekwani kwawe; avale va wombako makuhu va phazamile kukhukhela ha wananani kwawe.

⁴ Wuxungu wawe wu fana ni wa minyoka; va fana ni mamba ya diphanzeve, yi ti tsivako tinzeve.

⁵ Kasiku yi si engisi tindando ta va masalamuso, ni wutxhari wa vanyamsoro.

⁶ Awe Txizimu, va kunulele makwasa mkanani kwawe, Mkoma, dula titshaya ta singonyamoana.

⁷ Va na mwalale nga mati ale ma phwako; ngako va txi khwinza tingove tawe, ti na maneke ti di komokete.

⁸ Vona va na nyeke kufana ni khutumba; kufana ni txirumbu txo txhiswa, va nga wone ditambo.

⁹ Tikhadi tawe ti sanzi kuhala ngu kupfa mndilo wa tikhuni to nakana mwendo to oma, ti na hangalaswe ngu txihuhuri ti tshotshwa kule.

¹⁰ Mlulami a na tsaka, ngako a txi wona kuphotelwa a na samba mikondo yakwe ngu mnoha wa vabihi!

¹¹ Se vathu va na womba va txi kha vona: “Kha dikhuri mlulami ana ni hakhelo! Ngu ditshuri txi ho Txizimu txi txi lamulako ha mafuni!”