Masalmo 57 - Bhiblia Yo Sawuleka

Kutsana masoni ka Txizimu

Yo bhalwa ngu Dhavhidha, mbimo yi a nga thava ka Sawule, kona phakoni

¹ Telwa ngu wumbilu ni nani, awe Txizimu, telwa ngu wumbilu, nguko moya wangu wu themba awe. Ni lava kusisala hahatshi ka mabhapi ako, kala phango yi txi pinda.

² Ni na dila ka Txizimu, Nyatxitimwi, Txizimu txi txi ni ningako sotshe si ani ni si lavako.

³ Txona txi na rumela txivhuno txa txona ngu nzumani txi txi ni hanyisa ka vale va lavako ku ni fuvisa; Txizimu txi na rumela lirando la txona ni ditshuri da txona.

⁴ Moya wangu wu randetwe ngu tingonyamo, ti ti dyako vathu; makwasa a tona ma fana ni siholoma ni miseve se lidimi la tona li fana ni matxhari o lotwa.

⁵ Awe Txizimu, kombisa wuhombe wako nzumani wudhumo wako wu na fenengete dotshe ditiko!

⁶ Va riyile txikelemu ve txi veka ha nzilani kwangu moya wangu wu namile; va kete diphala masoni kwangu, aniko ngu vona va nga hojomela ka dona.

⁷ Mbilu yangu yi tsani, awe Txizimu, mbilu yangu yi tsani ni na embelela tindando ta ku kudhumisa.

⁸ Moya wangu, wuka! Wukani awe txitende ni nawe haripa! Nyamsi ni lava kuwusa wuronga!

⁹ Ni na ku bonga, hagari ka vathu, awe Mkoma, ni na kudhumisa ngu tindando hagari ka mifumo.

¹⁰ Lirando lako nda hombe, li hoka ni tinzumani ni kuthembeka kwako kumanela marefu.

¹¹ Awe Txizimu, kombisa wuhombe wako nzumani, wudhumo wako wu na fenengete dotshe ditiko!