Masalmo 50 - Bhiblia Yo Sawuleka

Kukhozela ni wutomi

Disalmo da Asafe

¹ Txizimu txa mtamo wotshe, Mkoma a wombile; a rambile vaaki va ha mafuni kukhukhela wutxani kala mswa-ditambo.

² Txizimu txa woninga kukhukhela Siyoni, didhoropa da kutshura ko hetiseka.

³ Txizimu txathu txi nata, kambe kha txi na mbi ta malala; masoni ka txona kuhuma mndilo wo hisa ngutu, ka otshe madhawa a txona, ku na ni txihuhuri txa mtamo.

⁴ Txi di txitimwi, Txizimu txa ramba nzuma ni mafu, kasi kumaha tifakazi, nguko txi lava kulamula vathu va txona.

⁵ “Tshanganisani votshe vale va thembekako, avale va nga maha txitumelelano ni nani va txi ni phaxela timhamba.”

⁶ Hambi tinzuma ti na huwelela ti to Mkoma a lulamile, nguko Txizimu ngu txona txi lamulako.

⁷ “Engisani anu Vathu vangu, ni lava kuwombawomba ni, kasi ku kuthethisa, awe Israyeli. Ani ngani Txizimu, Txizimu txako!

⁸ Kha ni na mbi kukawuka ngu mhaka ya timhamba, miningelo ya sihari u ni mahelako sotshe sikhati.

⁹ Kha ni ku kombeli ni da dimwedo ka otshe madhuna ako, hambi tiphongo ti u ku nato sibalani kwako,

¹⁰ nguko sotshe sihari sa txitinga sa ni lumba, kufana ni sile si manekako txitimwi ka magumi a mazana a mimango.

¹¹ Na si ziva sotshe sinyana sa mimangoni, ni sihari so tsimbila ngu dibindi sa txitinga si mtamoni kwangu.

¹² Idiku ani ni ni nzala, nga ti si laveki ku kugela, nguko ditiko ni sotshe si si manekako ka dona sa ni lumba.

¹³ Ina ani na dya nyama ya marole kani? Mwendo ina na sela mnoha wa tiphongo kani?

¹⁴ Mningelo wako wa ditshuri ka Txizimu ngu ku txi bonga ni kuxayisa sithembiso si u nga si maha ka Nyatxitimwi!

¹⁵ Ni dhane, mbimo yi u ku ha kuxuphekani; ani ni na kuhulukisa, se awe u na ni dhumisa.”

¹⁶ Aniko ka m'thu wo biha Txizimu txi womba tiya: “Ti kuvhuna txani kuwombetela milayo yangu ni kuhuwelela yotshe mbimo txitumelelano txangu,

¹⁷ na kuve khu tsaki, ngako ni txi kukawuka wo mbi khatala ngu mapswi angu kani?

¹⁸ Ngako u txi wonana ni makhokhokho wa engisana nawo, kambe wa patana ni vale va mahako wugango!

¹⁹ Wa ti toloveta yotshe mbimo kuwomba kubiha, kambe khu kanakani kuwomba makuhu.

²⁰ U womba-womba kubiha ngu mwananu; wa bhumisa phungo ya kubiha mwanana wa mame wako!

²¹ U mahetete totshe tiya, aniko ani ni malate; u pimisile ti to ani ni fana ni nawe. Aniko ni na kudhana ni ta kulamula, ni txi kuthethisa ngu mithumo yako yi u nga yi maha.

²² Engisani ta tinene, anu mi divalako Txizimu; kasiku ni si mi phatuleli, ku si maneki ni wammweyo wo mi hulukisa.

²³ Awule a ni mahelako mphaxo wa kubonga, ni na m'guleta; ni wule a tsimbilako ngu nzila yangu, ni na mkomba kuhanyisa ka Txizimu.”