Masalmo 48 - Bhiblia Yo Sawuleka

Jerusalema, didhoropa da Txizimu

Disalmo da mtxawa wa ka Kora. Ndando.

¹ Mkoma mbwa hombe, kambe a fanela kudhumiswa didhoropani ka Txizimu txathu, mmangoni kwakwe ko sawuleka!

² Siyoni, mmango wo tshura ngutu kupinda yotshe mimango, litsako la mafu otshe, ngu wona mmango wa ditshuri wa Txizimu.

³ Txizimu, txi txi ku mikhokholani ka txona, txi ti wonekisile kota wuthavelo wo tsana.

⁴ Vafumeli va pfananile, se votshe ve lwisa didhoropa.

⁵ Vambe, va di di woni, va tate ngu kuxamala, se va to dhuka ve tutuma ve thava.

⁶ Va to telwa ngu dizowa va txi pandiseka kufana ni wamsikati wu a lumwako ngu txirumbu;

⁷ kufana ni txihuhuka txi txi tako ngu wutxani, txi phatulelako tingalava ta Tarxixi.

⁸ Nga ha hi nga tiengisa, se hi ti woni didhoropani, ka Mkoma wa Mabutho a Tiyimbi, i ku didhoropani ka Txizimu txathu. Txizimu txi na di tsanisa kala kupinduka!

⁹ Nyumbani kwako, awe Txizimu, ka wunene wako hagari ka dithepele dako.

¹⁰ Nduma yako, awe Txizimu, yi hangalakile ni otshe mafu votshe va kukhozela; ngu mtamo wako, u maha kululama ni kudikha.

¹¹ Wu na tsake mmango wa Siyoni! Ma na tsake madhoropa a Judha, nguko kulamula kwako Mkoma ngo lulama!

¹² Randelani didhoropa da Siyoni, mi di dhawula balani sitezi sa dona;

¹³ Wonisisani ta tinene maguma a kona, wonisisani tinyumba ta kona ta wukoma, kasiku mi na sikota kuxawuta totshe, ka vanana va liveleko li litako.

¹⁴ “Nguko Txizimu txiya, ngu txona Txizimu txathu kala kupinduka. Ngu txona txi no hi thangela kala kufani!”