Masalmo 43 - Bhiblia Yo Sawuleka

Mkombelo wule a ku kule ni Ditiko dakwe

¹ Ni lamulele, Txizimu txangu; u txi ni lwela ka vathu va vo biha, va kwa mbi na wukhongeli! Ni hulukise ka vathu va makuhu, vo kanganyisa.

² Awe ngawe Txizimu, mlweli wangu! Ngu kutxani u txi ni rethela kule kani? Ngu kutxani ni zumbako kuxanisekani, ni tsotsorolwa ngu mlala kani?

³ Ni kombe liwoningo lako ni ditshuri dako, kasiku si ni komba nzila yi yi yisako mmangoni ka Siyoni, wuzumbeloni kwako ko sawuleka.

⁴ Konako ni na wulela txiluveloni kwako, awe Txizimu, awe u ku litsako langu; koneyo ni na kudhumisa ngu kuveta ka haripa, nguko awe ngawe Txizimu txangu.

⁵ Moya wangu, u thelwa dikhodho ngu txani, u txi thidhela kani? Themba Txizimu, ni ngadi ni txi na txi dhumisa. Txona i ku Txizimu txangu ni Muhanyisi wangu!