Masalmo 42 - Bhiblia Yo Sawuleka

DIBHUKU DA WUMBIDI DA MASALMO ( Masalmo 42--72 ) Mkombelo wa wule a ku kule ni Ditiko dakwe

Txithokozelo txa mtxawa wa Kora ka mthangeli wa vaembeleli

¹ Kufana ni mhuti yo pfa ditora yi tutumelako mnamboni, nanani na kuxuva, awe Txizimu txangu.

² Moya wangu wu ni ditora do lava Txizimu, Txizimu txo hanya! Ditshiku muni ni no ya wona khohe ya Txizimu kani?

³ Kudila mirongo, ngumba sakudya si ni dyako wusiku ni mitshikari, nguko ditshiku ni ditshiku va ni wotisa va txi kha vona: “Txi hani Txizimu txako kani?”

⁴ Moya wangu wa dhudhumela, ngako ni txi alakanya, mbimo yi ni nga ti longoloka ni vale va nga ti ya Nyumbani ka Mkoma va txi peka mikulungwani ya kutsaka ni kubonga, ni kugiringa ka vathu va kutsaka.

⁵ Moya wangu, u thelwa dikhodho ngu txani, u txi thidhela kani? Themba Txizimu, ani ni ngadi ni txi na txi dhumisa. Txona i ku Txizimu txangu ni Muhanyisi wangu!

⁶ Moya wangu wa thidhela, Txizimu txangu! Ngu toneto, ni zumba ni txi kualakanya, kukhukhela matikoni ka Jordhani ni mimangoni ka Hermoni ni Misari.

⁷ Hahatshi ka mikova yo hokoma ngutu kupfala kudhinda ka singwalangwanda sako; otshe mavimbi ako ni kukhulunga ka mati ako si pindile ngu txitimwi kwangu.

⁸ Aniko Mkoma a na ni rumela lirando lakwe, di di txite, kasiku ni txi m'dhumisa ngu lindando, di di swite, mkombelo ka Txizimu txi txi ni ningako wutomi.

⁹ Ni lava kuwombawomba ni nawe, Txizimu, ni txi khani: M'vhikeli wangu ngu ngawe, ngu kutxani u txi ni divala kani? U txi ni leka ni xupheka, na mlala wangu a txi ni xanisa?

¹⁰ I mhaka muni ni txi xanisekisa tiya kani? Valala vangu va ni ruketela ditshiku ni ditshiku va ni wotisa va txi kha vona: “Txi hani Txizimu txako kani?”

¹¹ Moya wangu, u thelwa dikhodho ngu txani, kambe u xanisekela txani mndani kwangu kani? Themba Txizimu, ani ni ngadi ni txi na txi dhumisa. Txona i ku Txizimu txangu ni Muhanyisi wangu!