Masalmo 41 - Bhiblia Yo Sawuleka

Mkombelo wa wule a lwalako

Disalmo da Dhavhidha. Ka Mthangeli wa vaembeleli.

¹ A katekile m'thu wu a alakanyako txisiwana; Mkoma a na m'hulukisa ka dikhombo.

² Mkoma a na mxayisa e mninga kuhanya, a na mninga kuzumbiseka ha mafuni; kambe kha na mbi mleka e xaniswa ngu valala vakwe.

³ Ngako a di ha ditahoni ngu kuxaniseka, Mkoma a na mtsanisa, amu ka malwati, Mkoma a na mu ongola.

⁴ Ani ni ti khani: “Mkoma ni pfele wusiwana; ni hanyise, hambiko ni nga kuonhela.”

⁵ Valala vangu va womba-womba kubiha ngu ngani va txi kha vona: “A na fa ditshiku muni m'thu wuwa, kasiku ditina dakwe di txi divalwa kani?”

⁶ Ngako mmwani a txi ta ku ta ni xola, wo tela ku ta womba ta kukanganyisa, a sengeleta mbiluni kwakwe wotshe wubihi. Mbimo yi a humako, a khata ku wu hangalasa.

⁷ Votshe va va ni vengelako, va ngurangura, va txi ni lenga; va pimisa kubiha ngu ngani va txi kha vona:

⁸ “Wulwati wakwe mbwa kubiha; a nga thuke e wuka kambe ngu ha ditahoni ha a nga otela kona.”

⁹ Hambi mndoni wangu, awu ni nga ti m'themba, awu ni nga ti dya nayo mbiyani kumweko, se konkuwa a ni wukete a txi ni ganyata ngu txizenende txakwe.

¹⁰ Kambe awe, Mkoma, ni divalele; u txi ni ninga kuhanya, kasi ni mana mtamo wa kupharela.

¹¹ Ngako mlala wangu asi ni xuli, ni na tiziva konako ti to wa ni tsakela.

¹² Awe u na ni vhuna, nguko ani ni hanya mndani ka ditshuri, u na ni ninga kuhanya yotshe mbimo masoni kwako.

¹³ A na dhumiswe Mkoma, Txizimu txa ka Israyeli, konkuwa ni yotshe mbimo! Ti na maheke! Amen ni amen!