Masalmo 40 - Bhiblia Yo Sawuleka

Ndando ya kudhumisa

Disalmo da Dhavhidha. Ka mthangeli wa vaembeleli.

¹ Ni verete ngu themba ka Mkoma se ene a to nama kwangu a txi engisa miketo yangu.

² A ni humisile diphalani ko thisa, ka ndope yi yi dayako; a ni emisile txitimwi ka dirigwi, a txi ni basisela tinzila.

³ Mkoma a ni ningile kuthula ndando ya yiphya, m'zeno wa kudhumisa Txizimu txathu. Vavangi, ngako va txi ti wona tiya, va na xamala, kambe va na themba Mkoma.

⁴ A katekile m'thu wule a thembako Mkoma awule asi londiseliko ava va kutikulisa, a txi hambana ni va va khozelako sizimu sa makuhu!

⁵ Awe Mkoma, Txizimu txangu, u hi mahete sixamaliso sako sa hombe; kha nga ho m'thu wu a dinganiswako ni nawe! U mahile makungo a hombe o xamalisa a ku hi vhuna; mithumo yako, hambi idiku no lava ku yi bala ni ku yi xawuta, nga ni si sikoti, nguko nja kutanda vabali.

⁶ Awe khu naveli timhamba ta sihari mwendo ta mitxelo ya mafu, khu vileli kambe timhamba to hiswa, to dihela sionho.

⁷ Ngu konako, ni wombile ni txi khani: “Ni ho hawa! Dibhuku da Mlayo da ni gela ati ni fanelako ku ti maha.”

⁸ Ni tsaka ngutu ngu kumaha kuranda kwako, Txizimu txangu; Mlayo wako wu mndani ka mbilu yangu!

⁹ Ni nuwete sithembiso sako masoni ka votshe vathu; awe wa tiziva, Mkoma, ti to kha na malala!

¹⁰ Kha na sisa mbiluni kwangu sithembiso sako; yotshe mbimo na nuwela kuthembeka kwako ni kuhanyisa kwako. Kha na sisela vathu vako, lirando lako ni kuthembeka kwako!

¹¹ Mkoma, u nga ni lambele lirando lako; lirando lako ni ditshuri dako, si na ni vhikele yotshe mbimo!

Mkombelo wa kulava kuvhunwa ngu Txizimu

¹² Ni randetwe ngu makhombo o tala ngutu; sionho sangu si ni khubhunyetile ni kuwona kha ni woni! Sionho sangu sitate kupinda misisi ya msungo wangu; ngu toneto, mbilu yangu ya rereka.

¹³ Mkoma, ni pfele wusiwana! Ngono u ta ni hanyisa! Ngono ngu txikuluveta u ta ni vhuna!

¹⁴ Va na thelwe tingana votshe vale va lavako ku ni daya. Va na tshumelele msana ve xowoka ngu tingana votshe vale va ni navelelako makhombo!

¹⁵ Va xowokise u txi va thela tingana avale va ni sekako, va txi kha vona: “Ahaa! Ahaa!”

¹⁶ Va na tale ngu litsako avale va ku lavako, avale va navelako kuhanyisa kwako, va na wombe yotshe mbimo va txi kha vona: “Mkoma ngene i ku Txizimu!”

¹⁷ Mkoma, ni xayise, ani ni ku txikulungu txo mpwata-ni-wangu! Awe ngawe m'vhuni wangu ni m'hulukisi wangu; u nga swele, Txizimu txangu!