Masalmo 39 - Bhiblia Yo Sawuleka

Kuxaniseka ni kutisola

Disalmo da Dhavhidha. Ka mthangeli wa vaembeleli - kasi kutisola

¹ Ani ni to khani: Ni na xayisa tinzila tangu, kasi ku ni si onhi ngu lidimi langu; ni na xayisa txisofu txangu ngu matomu mbimo yile m'bihi a ku masoni kwangu.

² Ni malate ni si wombi txilo, kha na womba dipswi ni da dimwedo. Aniko kupandiseka kwangu ku to engeteleka;

³ mbilu yangu yi ti tura khanani kwangu! Kuxanisekani kwangu, ku to tura mndilo mndani kwangu; se ni wombile ni txi khani:

⁴ “Mkoma, ni zivise magwitelo angu; ni mtengo wa masiku angu, kasiku ni ziva ti to ni mpindi!”

⁵ U ni ningile kuhanya masiku amadotho ngutu; masiku a kuhanya kwangu hi nga txilo masoni kwako. M'thu, hambi a txi tipfa a di tsani i mbukanganyisi wo gwita!

⁶ Ene wa pinda kufana ni mtsudi! Kha ti vhuni txilo kusengeletela tithomba, na asi ti zivi ti to ti na sala ni mani.

⁷ Ti di ngeto, Mkoma, ni na themba mani? Ani, themba yangu ngu ngawe!

⁸ Ni hulukise ka sotshe sihambunyeto sangu; u nga ni mahe txisekiso ka siphukuphuku.

⁹ Ni malate, kha ni na mbi tula txisofu, nguko mthumo wuwa mbwako.

¹⁰ U nga swe u txi ni peka; na guma mtamo ngu kunemela ka dianza dako.

¹¹ U tsayisa m'thu kasiku e khawula ka wubihi wakwe kufana ni sumba, awe wa fuvisa atxile m'thu a txi dhundako ngutu. Kunene votshe vathu mba kanganyisi dwe!

¹² Mkoma, engisa mkombelo wangu, riya nzeve u txi engisa miketo yangu! U nga ti hunde, ngako u txi pfa kudila kwangu. Masoni kwako ani ni nyamtangumo, ni mpindi kufana ni votshe vakale vangu.

¹³ U nga ni ronokele kasiku ni mana kupepa, di sinzi kuhoka ditshiku da kufa, ni txi rura ha mafuni.