Masalmo 35 - Bhiblia Yo Sawuleka

Mkombelo wo kombela kuvhunwa ngu Txizimu

Disalmo da Dhavhidha

¹ Mkoma, abanisa avale va ni mangalelako; u txi lwa ni vale va ni lwisako.

² Teka txitxhavangu txako txa hombe ni txatxidotho u txi ta u ta ni vhuna.

³ Ñola ditxhari ni nzanga u txi lwa ni vale va ni hingako; Gela muhefemulo wangu ku khawe: Ani ngani ni muhanyisi wako!

⁴ Va na thelwe tingana avale va lavako ku ni daya; va na thave va di kanganyisekile avale va ni pimiselako kubiha.

⁵ Va na fane ni mwasi wu wu huhiswako ngu diphuho; ni mtamo wa Mkoma wu na va tutumise.

⁶ Nzila yawe yi nave ni txidema ni ku rithimuka; ni mtamo wa Mkoma wu na va hinge.

⁷ Nguko, va ni riyete, va si nga ni txigelo; va kete diphala va si nga ni txigelo, kasiku ni hojomela ka dona.

⁸ Va na humelwe ngu dikhombo di di si ziviko kuwonwa! Va na bzwetwe ngu mlawu wu va nga ni riyela ngu wona! Va txi wa mu ka diphala di va ngadi kela!

⁹ Ani na tala ngu litsako, nguko Mkoma a ni ningile kuxula.

¹⁰ Ngu yotshe mbilu yangu ni na womba ni txi khani: “Kha txi nga ho tximwani Txizimu hahanze kwako Mkoma! Awe wa hulukisa sisiwana ni sikulungu ka vale i ku va mtamo ngutu kupinda sona, avale va si dyelelako!”

¹¹ Tifakazi ta makuhu ti ni wukete, ti ni wotisile ngu timhaka ti ani ni nga mbi ti maha.

¹² Va ni tshumetete wunene ngu wubihi, ni sala ni si nga ni tangu.

¹³ Kambe, mbimo yi vona va nga txi lwala, ani ni ti ambala disaka ni txi va xanisekela ngu kutitona sakudya ni ku va kombelela.

¹⁴ Ni txi zumba ni txi xaniseka, kufana ni kupandisekela mngana mwendo mwanathu; nga wo felwa ngu mame wakwe.

¹⁵ Aniko mbimo yi ni nga humbwa, va to tshangana va txi ni seka; va to ni randela valala vangu, kasi ku ni lwisa, vathu vale ni si va ziviko va to ni peketela va si karali.

¹⁶ Va ni randete va txi ni xowokisela; ve gegeresela makwasa ngu txiviti ni nani.

¹⁷ Mkoma, u na wonetela tiya kala mbimo muni kani? Ni hulukise manzani ka sigevenga siya; ni hulukise ka mijembe ya tingonyamo tiya.

¹⁸ Ni na kudhumisa masoni ka votshe vathu vako; ni na kudhumisa hagari ka msengeletano.

¹⁹ Va nga thuke ve tsaka ngu dikhombo dangu, avale va ni nyenyako hahanze ka mnandu;

²⁰ Vona kha va nga ni mipimiso ya kudikha; va wukela vathu va i ku sisiwana amu ditikoni; ve maha sikungo sa wukanganyisi,

²¹ va asama ngutu sisofu sawe, ve womba kwangu va txi kha vona: “Athu hi ti woni ati u nga ti maha!”

²² Aniko awe, Mkoma, u ti woni nawe! U nga malale! U nga ti hambanise ni nani, Mkoma!

²³ Vhumuka u wuka uya kulamulwani kwangu, kasi kuya ni emela, Txizimu txangu ni Mkoma wangu!

²⁴ Awe u lulamile, Mkoma, Txizimu txangu. Ni lamule. U nga va tumelele va txi ni seka!

²⁵ Va nga thuke ve womba timbiluni kwawe va txi kha vona: “Hi tsakile! Hi mfuvisile!”

²⁶ Va na vhilinganyiswe ve thelwa tingana votshe vale va tsakako ngu kuxupheka kwangu; va na tale ngu kuxowoka ni tingana votshe vale va ti guletako va txi ni wukela.

²⁷ Aniko va na tsake va txi giya avale va ti zivako ti to ni wamnene; kambe va na wombe yotshe mbimo va txi kha vona: “Mkoma mbwa hombe! Mkoma a dhunda wunene wa txithumi txakwe!”

²⁸ Konako ni na kudhumisa, Mkoma, ngu kululama kwako; dotshe ditshiku ni na embelela wudhumo wako!