Masalmo 33 - Bhiblia Yo Sawuleka

Ndando ya kudhumisa

¹ Giyani ka Mkoma anu mi ku vo lulama: Nguko kudhumisa ku fanete vavanene.

² Dhumisani Mkoma ngu kuveta txitende; embelelani masoni kwakwe ngu kuveta txitende txa titxhapu ta digumi.

³ Embelelani kwakwe ndando ya yiphya; vetani ngu wuzivi, mi txi mkulungela!

⁴ Mapswi a Mkoma nga ditshuri; mithumo yakwe yi komba kuthembeka kwakwe.

⁵ Mkoma yotshe mbimo a lava kululama ni ditshuri; lirando lakwe la tata ditiko dotshe!

⁶ Ngu dipswi da Mkoma; ku vangilwe nzuma ni sotshe sasingi sikuho ngu moya wa txisofu txakwe.

⁷ A tshanganisile mati a linene ka wukhalo wumwewo; minambo ni maziva ka makhalo ya kona.

⁸ Ditiko dotshe di na thave Mkoma; vaaki va dotshe ditiko va na dhudhumele masoni kwakwe.

⁹ Nguko a to womba, se sotshe si maheka; a to ruma, se sotshe si humelela.

¹⁰ Mkoma wa vhinganyisa makungo a matiko; ene wa va thindekisa kumaha makungo awe.

¹¹ Aniko makungo a Mkoma ma zumba mbimo yotshe; mipimiso ya mbilu yakwe ya simama ka liveleko ni liveleko.

¹² Di katekile ditiko dile Txizimu i ku Mkoma wa dona; ni vathu vale txi nga va sawula kuva thomba ya txona.

¹³ A di nzumani, Mkoma wa rinza maso akwe a txi wona votshe vanana va vathu;

¹⁴ Mkoma wa va wona votshe vathu va hanyako ha mafuni.

¹⁵ Ngene a nga wumba timbilu tawe; wa ti wona totshe ti va ti mahako.

¹⁶ Mfumeli kha hulukiswi ngu mtalo wa mabutho, hambi wamwamna wa ndena kha xuli ngu mtamo wakwe wa hombe.

¹⁷ Mahantxhi a yimbi kha ma vhuni m'thu kuxula; ona kha ma hanyisi ngu mtamo wa ona wa hombe.

¹⁸ Mkoma ngene a xayisako ava va mthavako, avale va thembako wunene wakwe,

¹⁹ ene wa va hulukisa ka lifo kambe wa va veketa va txi hanya ka mbimo ya nzala.

²⁰ Themba yathu hi yi veka ka Mkoma; ngene i ku m'vhuni wathu kambe m'vhikeli wathu.

²¹ Mkoma ngene kutsaka ka timbilu tathu; nguko hi themba ditina dakwe do sawuleka.

²² Lirando lako, Mkoma, li na hi tsanise, nguko themba yathu hi yi veka kwako.