Masalmo 32 - Bhiblia Yo Sawuleka

Kutitshanza ni kudivalelwa

Txithokozelo txa Dhavhidha

¹ A katekile awule sionho sakwe si nga divalelwa, awule minandu yakwe yi nga divalelwa.

² A katekile m'thu wule mbiluni kwakwe ku singako ni wubihi awule, Mkoma asi maniko kugombonyeka mbiluni kwakwe.

³ Mbimo yi ni nga malala, marambu angu ma to karala ngu kudila kwangu dotshe ditshiku.

⁴ Nguko wusiku ni mitshikari dianza dako di ti ti ni nemela; Ni hisilwe ngu lisani nga tximilwa txa malanga.

⁵ Ni ti tshanzile kwako sionho sangu, kha na sisa wubihi wangu, ni txi khani: “Ni na ti tshanza ka Mkoma, sihambunyeto sangu”; se u divalete mnandu wa txionho txangu.

⁶ Ngu mhaka yeto, ka mbimo ya kuxaniseka, votshe vale va kuthembako va na khongela kwako, u txi ngadi u maneka; hambi mati amangi ma txi khulunga, kha ma na mbi va hokela.

⁷ Awe u wuthavelo wangu; Awe wa ni xayisa kuxanisekani; Awe wa ni tsanisa ngu tindando To tsanikisa ti txhatxhisako.

⁸ “Ni na kugondisa ni txi kukomba nzila yi u fanelako ku yi londeta; ni na kutsimbitisa ni si leki ku kulwela.

⁹ U nga ti mahe ku nga dihantxhi mwendo ku nga mbongola, asi si ku si nga ni mapimo, asi si lavako dijoke ni matomu, kasiku u sikota ku si ñola ngu hafuhi.”

¹⁰ Timhaka tatingi ta xanisa vathu vo biha, aniko lirando la Mkoma, li ranganyeta avale va mthembako.

¹¹ Tsakani, kambe giyani ngu kualakanya Mkoma, vathu vavanene vo dhundeka; embelelani ngu kutsaka, anu motshenu mi ku vo lulama ni kuthembeka!