Masalmo 30 - Bhiblia Yo Sawuleka

Kubonga ka wu a nga hulukiswa ka lifo

Disalmo da Dhavhidha. Ndando ya kutulwa ka Dithepele

¹ Ni na dhumisa wuhombe wako, Mkoma, nguko awe u ni hulukisile kambe khwa tumela ti to valala vangu va txi ni seka.

² Mkoma, Txizimu txangu, ni ku kombete txivhuno, se awe u ni hanyisile.

³ Mkoma, awe u ni hulukisile ka lifo; u ni hanyisile, ani se ni nga ti relete diphalani.

⁴ Embelelani, mi txi dhumisa Mkoma, anu motshe mi mthembako; m'bongeni mi txi huwelela tito, a sawulekile!

⁵ Kuhenya kwakwe nga mbimo yayidotho dwe, aniko wunene wakwe mbwa yotshe mbimo. Ni wusiku hi otela hi txi dila, kambe ni mixo ha peka mikulungwani ya litsako.

⁶ Ani ni ti tipfa ni di tsani ni txi pimisa nokha ni txi khani: “Kha ni na mbi va ni kuxulwa.”

⁷ Awe u wamnene kwangu, Mkoma, kambe u ni ningile kutsana, aniko, ngako u txi ni tshuralela, na tala ngu dizowa.

⁸ Na kwangula kwako, Mkoma; na ku kombela u ni pfela wusiwana.

⁹ Dibhindu muni di no maneka ngu kufa kwangu, ni kurelela kwangu diphalani ka vafi kani? Ina lithulu li nga kudhumisa kani? Mwendo li nga womba-womba ngu ditshuri kani?

¹⁰ Ni engise, Mkoma, telwa ngu wumbilu ngu ngani; Mkoma, ngono u ta ni vhuna!

¹¹ Hindula kudila kwangu ku txi maha kusinya ka litsako; ni thavise mkhwasi u txi ni ambeka si ambalo sa litsako.

¹² Ti di ngeto, Mkoma, Txizimu txangu, ni na embelela ngu ngawe ni si gwiti, ni na kudhumisa kala kupinduka.