Masalmo 29 - Bhiblia Yo Sawuleka

Mtamo wa Txizimu amu ka txihuhuri

Disalmo da Dhavhidha

¹ Dhumisani Mkoma, anu sivangwa sa nzumani, dhumisani Mkoma, pfalisani mtamo wakwe ni wudhumo wakwe.

² Pfalisani ditina do dhumiseka da Mkoma; khizamelani Mkoma nyumbani kwakwe ko sawuleka.

³ Dipswi da Mkoma da pfala hagari ka linene; Txizimu txo dhumiseka txa dhindisa nzuma txitimwi ka Linene la hombe!

⁴ Dipswi da Mkoma di ni mtamo, dipswi da Mkoma di tate ngu wuhombe.

⁵ Dipswi da Mkoma da wisa mindonga ya mikedhari; Mkoma wa wisa mikedhari ya Libhanoni!

⁶ Ene wa maha ti to mimango ya Libhanoni yi ndaka kufana ni marole wa maha ti to mmango wa Hermoni wu ndaka kufana ni dirole.

⁷ Dipswi da Mkoma da humisa titshatsha ta mndilo;

⁸ dipswi da Mkoma da dekadekisa txiwula; Mkoma wa dekadekisa txiwula txa Kadhesi!

⁹ Dipswi da Mkoma da maha ti to timhoti ti txhisa, da morisa mazokoro a mindonga ya txitinga. Nyumbani kwakwe votshe va kwangula va txi kha vona: “Wudhumo wu nave ka Txizimu!”

¹⁰ Mkoma wa fuma txitimwi ka ndambi; Mkoma a na fuma kala kupinduka!

¹¹ Mkoma wa ninga mtamo ngamu yakwe; Mkoma a katekisa ngamu yakwe ngu kudikha.