Masalmo 28 - Bhiblia Yo Sawuleka

Mkombelo wa kulava kuvhunwa ngu Txizimu

Disalmo da Dhavhidha

¹ Ni na kwangula kwako, Mkoma, awe dirigwi dangu; u nga tsive tinzeve ka mkombelo wangu. Ngako awe u si ni engisi, ni na fana ni vale va relelako mathowoni.

² Engisa mikombelo yangu, ngako ni txi kudhana, nga ti ni txi guleta manza angu, ni txi ma yisa nyumbani kwako ko sawuleka.

³ U nga ni pate ni sigevenga, ni vale va mahako kubiha; vona va womba kuthutha ka mu akelani wawe, aniko timbiluni kwawe, va na ni kubiha.

⁴ Va hakele madingano ni mithumo yawe, madingano ni kubiha ka simaho sawe. Va tshumetele madingano ni simaho sawe so biha; va ninge asile si va fanelako.

⁵ Vona kha va khatali ngu tile Mkoma a nga ti maha, kambe kha va wonisisi mithumo yakwe ya hombe; ngu mhaka ya eto, a na va tsayisa, a txi va lovisa kala kupinduka.

⁶ A na dhumiswe Mkoma, nguko a engisile mikombelo yangu.

⁷ Mkoma ngene m'vhikeli wangu wa mtamo; ni themba ene ekha, ene a ni vhuni, ngu toneto mbilu yangu yi tsakile, se ni na dhumisa ngu kuembelela tindando.

⁸ Mkoma ngene i ku mtamo wa ngamu yakwe; ene wa lwela ni kuhanyisa mfumeli wu a nga msawula.

⁹ Mkoma, hulukisa ngamu yako, u txi katekisa vathu va va kulumbako; va xayise nga m'dyisi, u txi va vekisa kala kupinduka.