Masalmo 27 - Bhiblia Yo Sawuleka

Kuthemba Txizimu

Disalmo da Dhavhidha

¹ Mkoma ngene kuwoninga kwangu ni kuhanyisa kwangu. Ni nga thava mani kani? Mkoma i mkhokhola wa kuhanya kwangu. Ni nga dhukiselwa ngu mani kani?

² Ngako vathu va kubiha va txi ni wukela ve zama ku ni daya, ngu vona valala vangu va humbwako va txi wa.

³ Hambi ngako dibutho da yimbi di txi ni randela, kha ni na mbi va ni dizowa; hambi ngako valala ve xoma va txi ni talela, ani ni na maneka ni di tsani.

⁴ Tximaha tximwetxo ni kombelako ka Mkoma, tximaha tximwetxo ni txi navelako; ni navela kuzumba Nyumbani ka Mkoma otshe masiku a kuhanya kwangu, ti to ni txi pfa lirando la Mkoma ni mkhozela Nyumbani kwakwe.

⁵ Ngako ma txi ni hokela masiku a kubiha, Moma a na ni lwela; ene wa ni sisa nyumbani kwakwe; a na ni hulukisa ngu ku ni veka txitimwi ka dirigwi.

⁶ Ti di halo, ni na sikota kuguleta msungo wangu txitimwi ka valala vangu; ni na sikota kuphaxa mhamba yangu mu Nyumbani ka Txizimu, ni peka mkulungwani wa litsako ni kuembelela tindando to dhumisa Mkoma.

⁷ Ni engise, Mkoma, ngako ni txi kukombela txivhuno; telwa ngu wumbilu ngu ngani, u txi ni xamula!

⁸ “Mbilu yangu ya ni gela, yi txi kha yona: Tsula u txi ya wonana ni Mkoma;” Ina, ani ni lava ku kuwona, Mkoma!

⁹ U nga ni tshuralele! U nga ni henyele! Ngawe wekha u ku m'vhuneteli wangu! U nga ni leke. U nga ni tshotshe, awe Txizimu, Muhanyisi wangu.

¹⁰ Hambi idiku tate wangu ni mame wangu vo ni leka, Mkoma a na ni xayisa.

¹¹ Ni gondise, Mkoma, ati u ti lavako ni ti maha, u ni tsimbitisa ngu nzila yo lulama, nguko valala vangu mbavangi.

¹² U nga ni ningele ka valala vangu, avale va ni wukelako ngu makuhu ve phika ku ni mahela tshofu.

¹³ Kambe ani, na themba ngu kutsanisa ti to ni na wona wunene wa Mkoma ditikoni ka va va hanyako.

¹⁴ Themba Mkoma! Tsanisa, u nga thave txilo, themba Mkoma!