Masalmo 23 - Bhiblia Yo Sawuleka

Txizimu m'dyisi wangu

Disalmo da Dhavhidha

¹ Mkoma i m'dyisi wangu; kha ni na mbi pwata txilo.

² Wa ni humuta hagari ka lihunga lo nakana kambe wa ni gola a txi ni yisa ka mati o tenga.

³ Wa xayisa moya wangu kambe wa ni tsimbitisa ngu tinzila to lulama, ngu mhaka ya ditina dakwe.

⁴ Hambi ni txo tsimbila mkovani ka mtsudi wa lifo, nga ni si thavi txilo, nguko awe, Mkoma, u ni nani. Nguko ndonga yako ni mtxheketelo wako, sa ni tsanisa.

⁵ U ni lulamisela m'buso masoni ka valala vangu. U ni totile msungo wangu ngu mafura o bhumula u tata digombe dangu, di thekelela.

⁶ Kha ditshuri, wunene wako ni lirando lako si na va ni nani ka otshe masiku a kuhanya kwangu. Ni na zumba nyumbani ka, Mkoma, kala kupinduka.