Masalmo 22 - Bhiblia Yo Sawuleka

Xomulo ni kudhumisa

Disalmo da Dhavhidha. Ka mthangeli wa vaembeleli - Ngu wutxenje wa “Mhoti ya Mixo.”

¹ “Txizimu txangu, Txizimu txangu, u ni lekete txani kani?” Ngu kutxani u swelako kuxamula mapswi a kudila kwangu kani?

² Txizimu txangu, na dila ni mitshikari, kambe khu ni xamuli; na dila ni wusiku, kambe kha ni mani kuzumbiseka.

³ Kambe awe u Msawuleki, awe u zumba ha txiluveloni, na u txi dhumiswa ngu Israyeli.

⁴ Awe va ku thembile vatate vathu; va ku thembile, se awe u va hulukisile.

⁵ Va kombete txivhuno kwako, se ve huluka ka phango; awe va ku thembile, kambe kha va wiswa tingana.

⁶ Aniko ani ni mbungu, kha ni nga m'thu, ni txisekiso masoni ka vathu, na eyiswa ngu ditiko.

⁷ Votshe vale va ni wonako va ni tseketsela; va minula ngu txisofu, ve zinginika misungo va txi kha vona:

⁸ “A thembile Mkoma, se ene a na m'hulukise; a na m'hanyise, ngako a mrandako.”

⁹ Awe u ni xayisile kukhukhela mndani ka mame wangu u txi ni veka ni xayiseka manzani kwakwe.

¹⁰ Ni sanzi kuvelekwa, awe u ni xayisile; kukhukhela mndani ka mama, awe u Txizimu txangu.

¹¹ U nga ti hambukise ni nani u txi tsula kule, nguko dikhombo di hafuhi, kha ni nga ni wa ku ni vhuna.

¹² Valala vavangi vo nga tikuzi ta tihomu, va ni randete; va ni randete nga tikuzi ta tihomu ta tshofu ta ditikoni ka Bhasani.

¹³ Va asama sisofu sawe, kufana ni tingonyamo ti bhongako vona va tula madomu awe kasi ku ni kakatxula.

¹⁴ Ni fana ni mati ma thekelako; otshe marambu angu ma nguda-nguda. Mbilu yangu yi fana ni phula, ayi yi nyivilikako mndani kwangu.

¹⁵ Mkolo wangu wu omile kufana ni mraka wo hiswa ni lidimi langu li namarete mkanani kwangu. Awe u ni lekile hafuhi ka diphala.

¹⁶ Timbwa koko ti ni randete; mtxawa a sigevenga wu ni randete; va ni vharulete manza ni mikondo yangu.

¹⁷ Ni nga sikota kubala otshe marambu angu; valala vangu va ni wona, va txi ni ronolela.

¹⁸ Va abanile syambalo sangu ve xaxuva tixolo ngu dibhaji dangu.

¹⁹ Aniko, awe Mkoma, u nga eme kule ni nani! Awe u mtamo wangu! Ngono ngu kukuluveta u ta ni vhuna!

²⁰ Hulukisa wutomi wangu ka ditxhari; u nga leke timbwa ti txi ni daya.

²¹ Ni hulukise ka sisofu sa tingonyamo toneto; u txi ni hulukisa ka titxheho ta tinyari ta vamatune.

²² Sekoko ni na xawutela ka maxaka angu ati u nga maha; kambe ni na kudhumisa hagari ka msengeletano, ni txi khani:

²³ “Anu mi thavako Mkoma, m'dhumiseni! Li na m'dhumise lotshe liveleko la Jakobe! Li na mxoniphe lotshe liveleko la Israyeli!

²⁴ Nguko ene kha soli, kambe kha nyenyi kuxaniseka ka sisiwana kambe kha si tshuraleli. Aniko wa si engisa mbimo yi si kombelako txivhuno.”

²⁵ Ni na kudhumisa ni si karali, hagari ka msengeletano wa hombe. Masoni ka vale va ku khozelako, ni na tatisa sithembiso si ni nga si maha.

²⁶ Sisiwana si na dya kala si khura; avale va lavako Mkoma va na m'dhumisa. Va na hanye ta tinene kala kupinduka!

²⁷ Vathu va yotshe mifumo va na alakanya Mkoma; ngu ka otshe madhawa a ditiko va na wuya kwakwe. Totshe tihunzu ti na mkhozela.

²⁸ Nguko Txizimu i Mfumeli, ngu txona txi fumako vathu votshe.

²⁹ Va na m'dhumise ava va nga relela mathowoni; votshe avale vafako va na name masoni kwakwe, nguko ene ngene a ningako wutomi.

³⁰ Vatukulu vawe va na mthumela; va na xawutela ka liveleko ni liveleko.

³¹ Va nata xawutela wululamo wakwe ka vathu va va no velekwa nguko ngene a nga va va nga.