Masalmo 2 - Bhiblia Yo Sawuleka

Mfumeli wo sawulwa ngu Txizimu

¹ Ngu kutxani mifumo yi txi wusa vhilinganya kani? Ngu kutxani vathu va txi aka makungo o mbi vhuna txilo kani?

² Vafumeli va mafu va wukile, vakoma va maha txikungo hagari kwawe txa kuwukela Mkoma Txizimu, ni kuwukela Mkoma wule txona txi nga msawula.

³ Kambe va kha vona: “A hi funyeni makhodha awe! A hi tshotsheni kule ni nathu majoke awe!”

⁴ Awule a zumbako nzumani wa va seka, Mkoma wa va tseketsela.

⁵ Sekoko a womba-womba navo a di henyile a txi va ninga kuthava ngu kuhenya kwakwe, a txi khene:

⁶ “Ngani ni nga fumisa mfumeli wangu txitimwi ka wukhalo wangu wo sawuleka, mmango wangu wa Siyoni.”

⁷ Ni na huwelela txileleto txa Mkoma. Ene a ni gete, a txi khene: “Awe u mwanana wangu; nyamsi ni ku velekile.

⁸ Ni kombele ni na kuninga mifumo yi txi va i di thomba yako mafu otshe ma na lumba awe.

⁹ U na va bhandisa ngu ndonga ya simbi, u txi va fayetela kufana ni khadi ya mraka.”

¹⁰ Konkuwa koko anu vafumeli, txharihani; gondani, anu valamuli va vathu.

¹¹ Thumelani Mkoma Txizimu ngu txithavo, mi txi mtsakela ngu kudhudhumela.

¹² Khizamani masoni kwakwe, kasiku asi henyi, na nanu mi si lovi mi di ngadi ha nzila, nguko kuhenya kwakwe ka kuluveta kutura. Va katekile avale va thembako Mkoma!