Masalmo 148 - Bhiblia Yo Sawuleka

Kudhumisa ka sotshe Mkoma Txizimu

¹ Dhumisani Mkoma! Dhumisani Mkoma, mi di nzumani; m'dhumiseni mi di txitimwi ngutu!

² Mu dhumiseni, motshenu tingelozi takwe; mu dhumiseni, motshenu sivangwa sa nzumani!

³ M'dhumiseni awe ditambo ni mtxima; m'dhumiseni motshenu tinyeleti ti phatimako!

⁴ Mu dhumiseni, anu tinzuma ta tinzuma. M'dhumiseni, anu mati a txitimwi ka tinzuma!

⁵ Motshenu dhumisani ditina da Mkoma, nguko ene a to veka mthetho, se ku txi tumbunuka sotshe sivangwa.

⁶ Ene a vekile sotshe makhaloni ka sona kala kupinduka asi ningile mlayo, awu si tandekako ku wu eyisa!

⁷ Anu sivangwa sa ha mafuni, dhumisani Mkoma; m'dhumiseni, anu sihari so thisa sa linene ni kutshima ka lona;

⁸ tinyangafula ni maralala, hunguva ni txyandela; moya wa hombe wu engisako dipswi dakwe;

⁹ yotshe mimango ni situnga; yotshe mindonga ya mihando ni mikedhari;

¹⁰ sotshe sihari sa txitinga ni mitxhambi ya sifuyo; sihari sa kutsimbila ngu dibindi ni sotshe sinyana si purumako.

¹¹ M'dhumiseni, anu vafumeli va ditiko ni nanu motshenu vathu; motshenu tinduna ni valamuli va mafuni;

¹² mazambi ni mahorana vo kumba kumweko ni vavadotho!

¹³ Hi nga dhumisani ditina da Mkoma, nguko ditina dakwe ngu dona di guletwako; wudhumo wakwe wu txitimwi ka nzuma ni mafu!

¹⁴ Ene a ningile mtamo ni mfumo ka vathu vakwe, kasiku vasawuleki vakwe va txi m'dhumisa; vona vanana va ka Israyeli, i ku ngamu yakwe a yi randako. Dhumisani Mkoma!