Masalmo 143 - Bhiblia Yo Sawuleka

Kuthemba Txizimu

Disalmo da Dhavhidha

¹ Mkoma, engisa mkombelo wangu! Riya nzeve upfa kuvilela kwangu; ni pfisise madingano ni ditshuri dako, ni wululami wako!

² U nga lave ku ni thethisa ani txithumi txako, nguko masoni kwako kuwalo wu i ku wamnene.

³ Mlala wangu wa ni xanisa, wa ni ganyatela hahatshi; wa ni kurumeta kuzumba txidemani, kufana ni vale va nga fa kale.

⁴ Se moya wangu wa xomuleka mndani kwangu; ni mbilu yangu ya xaniseka khanani kwangu.

⁵ Na alakanya masiku a kaleko na pimisela yotshe mithumo yako; na khumbula sotshe simaho sa manza ako.

⁶ Na guleta manza angu kwako, ni khongela; Kufana ni mafu a kuoma, moya wangu wa pfa ditora ngu ngawe.

⁷ Mkoma, kuluveta u txi ni xamula, nguko ni gumile mtamo, u nga ni sisele khohe yako, ni nga fanane ni vale va yako diphalani.

⁸ Ni ninge kupfa wumbilu wako ni mixo, nguko ani ni themba awe. Ni kombe nzila yi ni fanelako kutsimbila ngu yona; nguko ni guleta moya wangu kwako.

⁹ Ni hulukise awe Mkoma, ka valala vangu; nguko ani ni thavela kwako.

¹⁰ Ni gondise kumaha kuranda kwako; nguko awe ngawe Txizimu txangu. Moya wako wa wunene wu na ni tsimbitise ka nzila yo lulama!

¹¹ Ni hanyise awe Mkoma, ngu mhaka ya ditina dako! Humisa moya wangu xomuloni, ngu mhaka ya kululama kwako!

¹² Fuvisa valala vangu, ngu mhaka ya wumbilu wako; kambe va khundumuse votshe vale va xomulako m'hefemulo wangu, nguko ani ni txithumi txako.