Masalmo 142 - Bhiblia Yo Sawuleka

Mkombelo wa kulava kuvhunwa ngu Txizimu

Txithokozelo txa Dhavhidha. Mkombelo wu a nga wu maha a ti diphalani

¹ Ni dite ka Mkoma ngu dipswi dangu ngu dipswi dangu ni khongete ka Mkoma.

² Ni tshakunuta txikarato txangu masoni kwakwe; ni mxawutela xomulo yangu:

³ “Ngako moya wangu wu txi guma mtamo, awe Mkoma, wa yi ziva nzila yi ni fanelako kuteka yona. Ka nzila yi ni nga txi tsimbila ngu yona, va ni riyete ngu mlawu.

⁴ Ni to tuve txinene kwangu, se ni wona; aniko kha na mana m'thu wo ni ziva; ni pwata ko thavela kona; kha ka maneka ni wammweyo wo khatalela moya wangu!”

⁵ Ni dite kwako awe Mkoma, ni txi khani: “Awe ngawe wuthavelo wangu; kambe u thomba yangu ka mafu ya va va hanyako!”

⁶ “Engisa kudila kwangu, nguko se ni gumile mtamo; ni hulukise ka vale va ni xanisako, nguko va na ni mtamo kupinda ani.

⁷ Thavisa moya wangu mkorani, kasiku ni na dhumisa ditina dako; vathu vo lulama va na ni randela, ngu kuwona makatekwa awa u nga ni mahela.”