Masalmo 141 - Bhiblia Yo Sawuleka

Mkombelo wa minova

Disalmo da Dhavhidha

¹ Mkoma, na dila kwako; engisa dipswi dangu, namisa nzeve yako ka huwa yangu mbimo yi ni ku dhanako.

² Mkombelo wangu wu na fane ni dibaselo di di hiswako masoni kwako ni kuguletwa ka manza angu ku na fane ni mhamba ya minova.

³ Mkoma, veka muwoneleli wa txisofu txangu ni mxayisi ha txikeni ka txisofu txangu.

⁴ U nga leke mbilu yangu yi wekelela ka to biha; mwendo kutalelwa ngu timhaka ta walo hambi vale va mahako to biha.

⁵ Ngako m'thu wo lulama a txi ni tsayisa, eto ndinene kwangu; ngako a txi ni kawuka, eto ti fana ni mafura o bhumula, kha ma na mbi khukha ha msungo kwangu; nguko ni na simama ni va khongelela ngu mithumo yawe yo biha.

⁶ Mbimo yi vathangeli vawe va no rinzwa ngu txitimwi ka siwindi ve wa hahatshi, eho vathu va na ti pima ti to mapswi angu nga ditshuri.

⁷ Kufana ni kule m'thu a dimako e veka mafuko ka mafu, Marambu athu ma hangalaswa ha txikeni ka dithitha.

⁸ Kambe maso angu ma kuwona awe Mkoma, Txizimu txangu; ani ni themba kwako; u nga leke moya wangu.

⁹ Ni vhikele ka milawu yile va nga ni riyela ngu yona; ni ka milawu ya tingoti tatingi ya vamahi va kubiha.

¹⁰ Vabihi va nawe ka milawu yawe vapune, kasi ku ni huluka do gwita.