Masalmo 139 - Bhiblia Yo Sawuleka

Ku va ho ka Txizimu

Disalmo da Dhavhidha. Ka mthangeli wa vaembeleli.

¹ Mkoma, awe u ni xolisisile, se awe wa ni ziva.

² Awe wa ziva kukhalahatsha kwangu, ni kukhukha kwangu ni ema; na u di kule, wa ziva mipimiso yangu.

³ Wa ni wona mbimo yi ni tsimbilako ni mbimo yi ni humulako; wa tiziva totshe tinzila tangu.

⁴ Ani ni sinzi kutula txisofu txangu, awe wa tiziva ngu kale ati ni lavako kuwomba.

⁵ Awe u ni bhiyete ngu ka otshe madhawa, u sanzekile manza ako txitimwi kwangu.

⁶ Wuzivi wo nga eto, kwangu wa xamalisa ngutu; wuzivi wo guleka ngutu, kha ni sikoti kuyipfisisa ngu mapimo angu.

⁷ Ni nga ya hani kasi kuya va kule ni Moya wako kani? Ni nga thavela hani kasi kuve kule ni khohe yako kani?

⁸ Ngako ni txi kwela nzumani awe waho koneyo; ngako ni txi relela ditikoni ka vafi, koneyo kambe waho.

⁹ Hambi idiku no mana mabhapi ni puruma ni ya wutxani mwendo ni txi ya zumba magwito ka linene,

¹⁰ koneyo dianza dako di na ni tsimbitisa, kambe dianza dako da txinene di nga ni xayisako!

¹¹ Hambi idiku no khani: “Txidema txi na ni khubhunyete, sekoko wusiku wu na va i di liwoningo, madhawani kwangu.”

¹² Hambi txidema kha txi ni sisi kwako; kambe wusiku wa woninga kufana ni mitshikari; Kwako txidema ni liwoningo sa fana!

¹³ Nguko u nga wumba kotshe mndani kwangu; u ni vangile mndani ka mame wangu.

¹⁴ Na ku bonga, nguko u ni wumbile ngu nzila ya kuxamalisa, mithumo yako ya diwukisa. Moya wangu wa tiziva kwati.

¹⁵ Awe u ni woni mbimo yi marambu angu ma nga txi wumbwa, mbimo yi ni nga txi kula kusisalani mndani ka mame wangu.

¹⁶ Maso ako ma ni woni ni si se velekwa. Otshe masiku a kuhanya kwangu ma bhatwe dibhukuni kwako; ma batwe mtengo wa ona ma sinzi ku va ho.

¹⁷ Mkoma, makungo ako ma ni lisima ngutu kwangu! Mtengo wa ona mbwa hombe ngutu.

¹⁸ Idiku na lava ku ma bala, nga ma txi pinda mafu ngu kutala; idiku no hoka magwito, nga ni si sikoti ku kupima awe.

¹⁹ Txizimu, fuvisa avale va mahako kubiha, anu sigevenga, hambukani mi tsula kule ni nani.

²⁰ Evo vathu va womba-womba kubiha ngu ngawe, valala vako va womba-womba kubiha ngu ditina dako.

²¹ Mkoma, ina kha ni va vengi avale va ku vengako kani? Kha ni va nyenyi avale va ku wukelako kani?

²² Na va nyenya ngu wotshe mtamo wangu! Ni va wona i di valala vangu!

²³ Ni xolisise, Txizimu, kasi kuziva mbilu yangu; ni duke kasi kuziva mi alakanyo yangu.

²⁴ Wona ti to mwendo ni tsimbila ngu nzila yo biha u txi ni tsimbitisa ngu nzila yi ni yisako ka wutomi wo mbi guma.