Masalmo 138 - Bhiblia Yo Sawuleka

Mkombelo wa kubonga

Disalmo da Dhavhidha.

¹ Na bonga, Mkoma, ngu yotshe mbilu yangu; na embelela wudhumo wako masoni ka tingelozi.

² Ni na rendekela dithepeleni kwako ko sawuleka, kambe ni na bonga ditina dako, ngu mhaka ya lirando lako ni ditshuri dako; nguko u guletile dipswi dako txitimwi ka dotshe ditina dako.

³ Ka ditshiku dile ni nga kudhana, u ni engisile u ni pfisisile, u tsanisa moya wangu.

⁴ Votshe vafumeli va mafu va na kudhumisa, awe Mkoma, ngako va txi engisa mapswi a txisofu txako.

⁵ Kambe va na embelela tinzilani ka Mkoma, nguko wudhumo wa Mkoma mbwa hombe.

⁶ Hambiko Mkoma a ku txitimwi ngutu, wa pfisisa awu i ku txisiwana; aniko ka m'thu wo ti guleta a m'ziva a di kule.

⁷ Ngako ni txi tsimbila hagari ka kuxaniseka awe wa ni hanyisa; u na nawuluta dianza dako u ni vhikela ka txiviti txa valala vangu se dianza dako da txinene di na ni hanyisa.

⁸ Mkoma ana ni txhukwatisela ati ti ni dinganako! Awe Mkoma, lirando lako nda kala kupinduka; U nga leke ha mpfhukani mthumo wa manza ako.