Masalmo 13 - Bhiblia Yo Sawuleka

Kuthemba lirando la Txizimu

Disalmo da Dhavhidha. Ka mthangeli wa vaembeleli.

¹ Mkoma, u na ni divala kala mbimo muni, kani? Wo ni leka ngu nyahele kani? U na ni sisela khohe yako kala mbimo muni kani?

² Ni na xaniseka ni kupandiseka moyani kwangu ni mbiluni kwangu otshe masiku, kala mbimo muni kani? Mlala wangu a na simama a di txitimwi kwangu kani?

³ Ni wone, Mkoma, u txi ni xamula, Txizimu txangu; woninga maso angu, ti to ma si oteli wukohe wa lifo.

⁴ Mlala wangu a nga thuke a txi khene: “Ni mxute.” Mlala wangu a nga thuke a txi giya ngu kuxuleka kwangu.

⁵ Ani ni themba wumbilu wako; mbilu yangu yi tsakela kuhanyisa kwako.

⁶ Ni na embelela ka Mkoma ni txi bonga wunene wu a nga ni mahela.