Masalmo 122 - Bhiblia Yo Sawuleka

Ndando ya kudhumisa Jerusalema

Ndando ya mpfhumba. Disalmo da Dhavhidha.

¹ Ni tsakile mbimo yi va nga kha vona kwangu: “A hi yeni Nyumbani ka Mkoma!”

² Mikondo yathu yi hokile ha txikeni kwako, awe Jerusalema.

³ Jerusalema, u didhoropa di tinyumba tako ti nga gwatamela ti nga akwa ngu kutsana ta tinene.

⁴ Eyo ti kwelako tiya kona tihunzu, tona tihunzu ta Mkoma, ve fakazela mlayo wa Israyeli, kasi kuya dhumisa ditina da Mkoma.

⁵ Nguko koneyo siho sikhalo sa wulamuli, sikhalo sa wulamuli sa nyumbani ka Dhavhidha.

⁶ Kombelelani kudikha ka Jerusalema. Va na humelela vale va randako kudikha.

⁷ Ku nave ni kudikha mndani ka maguma ako ni kuhumelela tinyumbani kwako ka wukoma.

⁸ Ngu lirando ka vanathu ni vangana vangu, ni na khani: “Kudikha ku nave ni nawe!”

⁹ Ngu mhaka ya Nyumba ya Mkoma, Txizimu txathu, ni na ku lavela si i ku sa sinene.