Masalmo 121 - Bhiblia Yo Sawuleka

Txizimu, m'vhikeli wathu

Ndando ya vapfhumba

¹ Na guleta maso ni wonetela mimangoni: Ku nata ngu hani kulamulelwa kwangu kani?

² Kulamulelwa kwangu ku nata ngu ka Mkoma, a nga va nga nzuma ni mafu.

³ Kha na mbi leka mkondo waku wu rithimuka; awule a ku xayisako, kha na mbi khudhahela.

⁴ Wona taku kha na mbi khudhahela, mwendo kuotela, awule a vhikelako Israyeli.

⁵ Mkoma ngene i ku m'vhikeli wako; Mkoma ngene mtsudi wako txinene kwako.

⁶ Ditambo kha di na mbi kuhisa ni mitshikari, hambi mtxima ni wusiku.

⁷ Mkoma a na kuvhikela ka kotshe kubihani; ene Mkoma a na vhikela wutomi wako.

⁸ Mkoma a na kuvhikela u txi wulela ni kuhumani kwako, kukhukhela konkuwa kala kupinduka.