Masalmo 12 - Bhiblia Yo Sawuleka

Hi ponise ka vo biha

Disalmo da Dhavhidha. Ka mthangeli wa vaembeleli - ka siya sa mtxhanu wa tingoti ni tiraru.

¹ Hi hanyise, Mkoma, nguko vathu vo lulama va gumile kha ku nga ho vathu vo thembeka hagari ka vanana va vathu.

² Mmwani a womba makuhu ka mmwani; va womba-womba ngu kukanganyisa, ni timbilu timbidi.

³ Va fuvise, Mkoma, vakanganyisi, ni votshe vale va wombawombako ngu kutikulisa,

⁴ va txi kha vona: “Hi na xula ngu mapswi athu; kuwombawomba ha sikota. I mani a no hi xula kani?”

⁵ Mkoma a khene: “Ngu mhaka ya kuxaniseka ka sisiwana ni miketo ya vale va si pwatako ni na khukha ni txi ema, kha Mkoma, ni na va veka kuhulukani avale va vilelako.”

⁶ Mapswi a Mkoma i mapswi a ditshuri, ngu nga silivhela ya ditshuri, ayi yi nga basiswa nyundoni mtxhanu wa sikhati ni simbidi.

⁷ Ina, Mkoma, awe u na hi xayisa kha kwati u txi hi lwela ka liveleko liya yotshe mbimo.

⁸ Vabihi va rendelekela ka otshe makhalo, na wubihi wu txi dhumiswa ngu vathu va ha mafuni.