Masalmo 118 - Bhiblia Yo Sawuleka

Kubonga Txizimu ngu mhaka ya kuxula

¹ Bongani Mkoma nguko ene mbwa mnene, nguko lirando lakwe la simama kala kupinduka.

² Va na wombe vanana va ka Israyeli va txi kha vona: “Lirando lakwe la simama kala kupinduka.”

³ Va na wombe vaphaxeli va Txizimu va txi kha vona: “Lirando lakwe la simama kala kupinduka.”

⁴ Va na wombe ava va kholwako kwakwe va txi kha vona: “Lirando lakwe la simama kala kupinduka.”

⁵ Kupandisekani kwangu ni khongete ka Mkoma; se Mkoma a ni engisile a txi ni hanyisa.

⁶ Mkoma a ni nani, kha ni thavi txilo; m'thu a nga ni maha txani kani?

⁷ Mkoma a ni nani; ngene m'vhikeli wangu se ni na va wona valala vangu va txi khoziswa.

⁸ Ndinene ngutu kuthemba Mkoma kupinda kuthemba vathangeli;

⁹ ndinene ngutu kuthemba Mkoma kupinda kuthemba vathangeli va mtamo.

¹⁰ Votshe vamatiko va ni randete, aniko ngu ditina da Mkoma, ni va phatulete

¹¹ Vona va ni randete ngu ka otshe madhawa, aniko ani ni va xute ngu ditina da Mkoma.

¹² Va ni pomete nga ditshunzulu da tinombe; va txi tura nga mndilo wu ku hagari ka mipa, aniko ani ni va xute ngu ditina da Mkoma.

¹³ Va ni susumetile ngu mtamo kasiku ni txi wa, aniko Mkoma a tile e ta ni vhuna.

¹⁴ Ani na bonga Mkoma a ni ningako mtamo; ene i Muhanyisi wangu!

¹⁵ Matendani ka vale vo lulama ku ni dipswi da kutsaka ka hombe ka kuhanyisa; “Dianza da txinene da Mkoma di hi hanyisile,

¹⁶ dianza da txinene da Mkoma da xamalisa; dianza da txinene da Mkoma di ni hanyisile!”

¹⁷ Kha ni na mbi fa, aniko ni na hanya kasiku ni xawutela mithumo ya Mkoma!

¹⁸ Mkoma a ni tsayisile, aniko kha ni leka ni txi fa.

¹⁹ Tulelani matimba a Nyumba ya Txizimu, ni lavako kuwulela ni dhumisa Mkoma!

²⁰ Atxiya ngu txona txike txi yisako ka Mkoma; valulami ngu vona va wulelako ngu ka txona.

²¹ Na ku bonga, Mkoma, nguko u ni xamute, awe u Muhanyisi wangu.

²² Dirigwi diya vaaki va ngadi nyenya di mahile dirigwi da hombe do tsanisa.

²³ Totshe tiya ti mahwa ngu Mkoma; ndimhaka to xamalisa masoni kwathu!

²⁴ Adiya i ditshiku da kuxula ka Mkoma: He embeleleni hi giya masoni kwakwe!

²⁵ Mkoma, ha kukombela, hi hanyise! Ha kukombela, Mkoma, hi ninge kuxula!

²⁶ A na dhumiswe awu a tako ngu ditina da Mkoma! Athu ha kudhumisa hi di Nyumbani ka Mkoma!

²⁷ Mkoma ngene i ku Txizimu, ene ngene a hi woningako! Khatani kumaha mibuso, mi txi longoloka mi di ñote matshanzu, kala kuhoka txiluveloni.

²⁸ Awe u Txizimu txangu, se ani na ku bonga; awe u Txizimu txangu, ani ni na huwelela wuhombe wako.

²⁹ Dhumisani Mkoma, nguko ene mbwamnene, nguko lirando lakwe la simama kala kupinduka.