Masalmo 114 - Bhiblia Yo Sawuleka

Kuhuma ka Vaisrayeli ngu Egipta

¹ Mbimo yi Vaisrayeli va nga huma ngu Egipta, txikhati txi nyumba ya Jakobe yi nga rura ditikoni ka vanyamthuvo,

² Judha a to hinduka eva nyumba yo sawuleka ya Mkoma se Israyeli e maha mfumo wakwe.

³ Mbimo yi linene li nga oma, li to thava se mnambo wa Jordhani wu tshumelela msana.

⁴ Mimango yi to jala nga tihamba ni mimango yi to ndaka nga sinvutana!

⁵ Awe linene, nji txani txi ku mahako u tutuma kani? Awe Jordhani, ngu kutxani u tshumelela msana kani?

⁶ Anu mimango, ngu kutxani mi txi jala-jala nga tihamba kani, ni nanu mimango mi ndakela txani nga sinvutana kani?

⁷ Awe mafu, dhudhumela masoni ka Mkoma, masoni ka Txizimu txa Jakobe,

⁸ txi nga hindula siwindi si maha maziva a mati ni marigwi me maha sisima sa mati.