Masalmo 111 - Bhiblia Yo Sawuleka

Kudhumiswa ka Txizimu

¹ Dhumisani Mkoma! Ni na dhumisa Mkoma ngu yotshe mbilu yangu txikungoni ka valulami ni msengeletanoni ka vathu.

² Mithumo ya Mkoma nja hombe yi lawako ngu votshe vale va manako kutsaka ka yona.

³ Mithumo yakwe yi tate ngu wunene ni kudhundeka kululama kwakwe kusimama kala kupinduka.

⁴ Mkoma kha hi leki hi divala sidiwukiso sakwe; ene a tate ngu wunene ni wumbilu;

⁵ wa ninga sakudya ka vale va mthavako; wa alakanya txitumelelano txakwe yotshe mbimo!

⁶ A kombisile ka vathu vakwe mtamo wa mithumo yakwe, ngu kuvaninga thomba ya vamatiko.

⁷ Totshe ti a ti mahako nda ditshuri ni kululama; milayo yakwe yi thembekile,

⁸ nguko yi tsanisilwe kala kupinduka yi mahilwe ngu ditshuri ni kululama.

⁹ Ene a thusile vathu vakwe e maha navo txitumelelano txo mbina magwito. Txizimu txi sawulekile, txi ni mtamo!

¹⁰ Wuzivi wa ditshuri ngu kuthava Txizimu; avale va txi khozelako va na ni mapimo. Txi na dhumiswe Txizimu kala kupinduka!