Masalmo 109 - Bhiblia Yo Sawuleka

Mkombelo wa m'thu wu a singetwako

Disalmo da Dhavhidha. Ka mthangeli wa vaembeleli

¹ Awe Txizimu txa kudhumisa kwangu, u nga malale.

² Vathu vo biha ni vathu va makuhu va womba kubiha ngu ngani, va womba makuhu ngu ngani.

³ Va ni randela ngu mapswi a livengo; va ni ruketela na ni si nga ni mnandu!

⁴ Va ni tshumetela lirando langu ngu livengo; aniko ani no khongela dwe.

⁵ Va ni tshumetela ngu wubihi, ve ni tshumetela lirando ngu wubihi.

⁶ Awe Txizimu, veka muonhi txitimwi ka mlala wangu, se Sathani a na eme ka didhawa dakwe da txinene.

⁷ A na lamulwe, a txi abaniswa; mkombelo wakwe wu na hinduke wu maha txionho!

⁸ Masiku a kuhanya kwakwe ma na komiswe txikhunja txakwe txi na tekwe ngu mmwani m'thu!

⁹ Vanana vakwe va na felwe ngu tate wawe ni msikati wakwe a na mahe noni!

¹⁰ Vanana vakwe va na mahe vapepeseki, va txi hanya ngu kukombela! Va na tutumiswe ve humiswa marumbini kwawe va nga ti kona!

¹¹ Vatxenekisi vakwe va na mtekele sotshe si a ku naso, kasi kudiha minandu; vanyamthuvo va na hande asi a nga thuma ngu manza akwe.

¹² Ku ngave ni wammweyo wa ku mxanisekela hambi wa kuxanisekela vanana vakwe va sikulungu.

¹³ Liveleko lakwe li na gume ni txibongo txakwe txi na fuve ka liveleko li litako.

¹⁴ Txizimu txi na alakanye sionho sa vatate vawe mame wakwe a nga divalelwe sionho sakwe

¹⁵ Sionho sa vaveleki vakwe si na woneke yotshe mbimo masoni ka Mkoma aniko Txizimu txi na fuvise lihunzu lawe ha mafuni!

¹⁶ Nguko eyo m'thu kha zivi kualakanya kutsetsa vakwawe; hahanze ka toneto, a xanisile sisiwana ni sikulungu ni sixupheki kala e si daya.

¹⁷ A randile kuruketela: “Konkuwa siruko si na wuyela ene! A ti si naveleli vamwani makatekwa: Ngu toneto, mathomo ma nave kule ni nene!

¹⁸ A fenengete kuruketela nga nguwo, kuruketela kwakwe ku na wulele masembeni kwakwe nga mati ku txi nakanisa marambu akwe nga mafura.

¹⁹ Kuruka kwakwe ku na mfenegete nga nguwo ku txi msunga nga libhande.”

²⁰ Mkoma a na tsayise nga toneto valala vangu, ni vale va wombawombako kubiha ngu ngani!

²¹ Aniko awe, Mkoma, Txizimu txangu, ni vhune ngu mhaka ya ditina dako. Ni hanyise ngu wunene ni lirando lako!

²² Ni txisiwana ni mxaniseki; mbilu yangu yi ni txilonda mndani kwangu.

²³ Ni na mwalala nga mtsudi wu wu thavako; va ni gubhuza nga humbi!

²⁴ Mazolo angu ma nguda-nguda ngu mhaka ya kutitona sakudya ni mmidi wangu wa karala ngu kugoma.

²⁵ Votshe va ni ruketela ngako va txi ni wona, va zinginika msungo ngu ku ni nyenya.

²⁶ Ni vhune, awe Mkoma, Txizimu txangu! Ni hanyise, madingano ni wumbilu wako!

²⁷ Kasiku ve tiziva ti to ngawe u ni hanyisako, ngawe upune u mahako txixamaliso txonetxo.

²⁸ Hambi vona va txi ni ruketela, kambe awe wa ni katekisa. Valala vangu va na wiswe tingana kambe txithumi txako txi na giye.

²⁹ Valala vangu va na tale ngu tingana; tingana tawe ti na va fenengete nga nguwo!

³⁰ Ni na bonga ni si gwiti ka Mkoma; ni na m'dhumisa hagari ka msengeletano wa vathu!

³¹ Ene i m'vhikeli wa sisiwana wa si hulukisa ka vale va lavako ku si daya.